Shillong, Naiwieng 04
U Joint Coordinator ka BJP Northeast u Rajiv Babbar u la pynskhem ba ka jingker sainar shiah ha shilynter ka khappud India bad Bangladesh ka la jan dep bad ong ba ïa ki jingeh ha ka liang ka jingstad saian ha Meghalaya yn sa pynbeit ha ka bynta ban wan.
U Babbar u la jubab ïa ki jingkylli halor u pud u sam jong ka Meghalaya bad ka Bangladesh bad ka jingkynnoh ba ki BSF bad ki pulit ka thaiñ ki khlem leh eiei.
“Peit, ngi la dep ban shna ïa ka jingker bad mynta ka dang sah sa tang 50 km, kumta ngi la leh ïa ka kam kaba bha bad kata ruh ka dang don ha ka kyrdan ba stad,” u la ong. Haba pyni nuksa bad ka West Bengal, kaba ïasam ïa ka khappud kaba 653 km bad ka Bangladesh, u la ong, “Ha kine ki 15 snem ba la dep, ngi la kyrpad ïa ka Mamata Banerjee ban ai ïa ngi ïa ka jaka, kam shym la ai ïa ka jaka. Mynta ka Sorkar BJP ka la sdang namar u Myntri Rangbah ba thymmai u la ai ïa ka jaka bad kane ka kam ker sainar ka lah ban ïaid shakhmat.”
Halor ka jinglong jingman ha Meghalaya, u la ong, “Nga tharai ba ki don katto katne ki jingeh kiba ïadei bad ka jingstad kiba yn sa lah ban pynbeit bad ha ka bynta kaba bud ngin sa ai ïa phi ïa ki jingtip ba bniah shen.”
Haba kylli halor ka jinglap ïa arngut ki nongthep vote bar ri ha Mawsynram konstitwensi, u Babbar u la ong ba ka nongrim jong ka BJP ka long ka bym treh ban ïakren.
“Uno uno uba shah lap ha kano-kano ka jaka, kam dei ka jingkylli jong u MLA ka BJP ne kiwei-kiwei ki MLA konstitwensi. Lada uba nabar u don hangtei, ka jingïeng jong ngi ka long kaba shai bha u dei ban don shabar ka ri, kam dei ban don ka jingkulmar,” u la pynskhem.
Da kaba pynpaw ba ka Special Intensive Revision (SIR) ka dei ka kam kaba shai, u la ong ba ki jingpynbna ki mih tang ban pynthikna ïa ka jinglong hok. “La ai ïa ki jingpynbna ban don ka jingshai kaba kham bha, kata ka mut ba ngi ailad ïa u briew ban kren bad ka jingpynbna kam mut ka rai kaba khatduh,” u la ong.
“La u briew u don ha ka konstitwensi ka BJP ne ha kano-kano ka Jylla, u bar ri um dei ban long u nongthep vote, kata ka dei ka jingïeng jong ngi,” la ong u Babbar.
U la pynshai ba ka SIR kam don jingïadei bad ka jingshah beh shnong. “Ka SIR kam don jingïadei eiei ban beh ïa ki briew, ka dei tang ka hok thep vote. Lada ngi lap ïa u briew u bym dei u nongshong shnong jong ka ri India, ka don ka rukom ban beh ïa ki. Baroh ar ki rukom ki long kiba kyrpang,” u la ong.
“Uno uno uba dei u nong India, la u dei ha Meghalaya, Nagaland ne Delhi, u dei u nongshong shnong ba burom jong ngi bad un ïoh lut ïa kiei-kiei baroh,” bynrap biang u Babbar.
