Shillong, Risaw 18
Ka tnad pulit ka Jylla ka la pynshai ba ka jingpynkiew kyrdan hapoh ka tnad la mynjur katkum ka jinglong rangbah ha ka kam bad ka ‘merit’, bad kam don satia kano-kano ka mat treikam halor ka bhah thung kam (Reservation Policy) haba ïadei bad kane ka liang.
“Ka long kaba donkam ban tip ba ym don kano-kano ka mat treikam ba ïadei bad ka jingbhah kam na bynta ki jingpynkiew kyrdan hapoh ka tnad. Ïa ki jingkiew kyrdan la mynjur katkum ka jinglong rangbah ha ka kam bad ‘merit’, kaba pyntikna ïa ka rukom treikam ka bym shah liang bad kaba pynshong nongrim ha ka jinglah,” ong ka kyrwoh na Asst. Inspector General of Police (L&O), Meghalaya, Shillong, Bah Vivek Syiem, IPS.
U la ong ruh ba ha kine ki ar snem ba la dep, la pyrkhat ban kyntiew kyrdan ïa 1471 ngut ki pulit kiba don ha ki kyrdan bapher-bapher, bad baroh ki jingkiew kyrdan la pynlong da kaba bud pyrkhing ïa ka jingpynbna bad ki hukum ba la pynmih da ka ophis DGP.
“Ïa ka jingtreikam baroh kawei la pynlong ha ka rukom kaba khuid ba shai, da kaba bud ryntih ïa ki kyndon ba la wanrah da ka ophis DGP. Kane ka pyntikna ba baroh ki jingkiew kyrdan la leh katkum ka jinglong rangbah ha ka kam, ‘merit’ bad ka jingdon jong ki kam kiba lait, da kaba pynneh ïa ka jinglong hok bad jingbym shah liang katkum ki kyndon ka tnad treikam,” u la ong.
Ha kawei ka liang, halor ki jingkynnoh kiba la mih hadien ka jingpynkiew kyrdan ba dangshen na ka kam Havildar sha ka Armed Branch AB Asstt. Sub-Inspector (AB ASI), u Bah Syiem u la ong ba ïa ka rukom pynkiew kyrdan la leh da kaba bud pyrkhing katkum ka jingpynbna na ka Director General of Police (DGP) Circular No. 65/2012 jong ka 25.09.2012. La ban jur ruh ba ym donkam ïa ki pulit ban ïaid lyngba ka ‘Cadre Course’ ban ïoh kiew sha ka kyrdan AB ASI. U la ong ruh ba ka kam jong ki AB ASI ka don kyrpang ha ka India Reserve Battalion, kata ha ka 3rd MLP (1 IRBN), 4th MLP (2nd IRBN), 5th MLP (3rd IRBN) & ka 6th MLP (4th IRBN) bad ki jingpynkiew kyrdan ki long tang ïa kine ki pyrton ba kyrpang.
Ha kajuh ka por, ka tnad ka la ong ban pyntikna ïa ka jingkynthup lang, la khot ïa ki kyrteng jong kito kiba don ka mon sngewbha na baroh ki distrik bad ki pyrton kiba don ïa ki kam Havildar.
“Ha kaba ïadei bad kane, 141 ngut ki Havildar ki la aiti ïa ka jingkwah jong ki ban shah kyntiew kyrdan. Ha ka jingbud ryntih ïa katei ka jingpynbna, la thaw ïa ka komiti ban khmih bniah haba ïadei bad ka rukom jied,” u la ong da kaba bynrap ba ka komiti ka la shong ha ka 07.10.2024 hapoh ka jingkhlieh u DIG (TAP). Utei u heh pulit u la ong ruh ba ïa ki jingtip shaphang ka jingshakri jong baroh kito kiba don mon, la lum thup bad bishar bniah da ka komiti kumjuh ïa ki kot ki sla ban bishar ha ka liang ka jinglong hok bad jingbit jingbiang. Hadien ba la pynlong ïa ka jingbishar bniah bad jingpeit bniah ïa baroh ki jingtip shaphang ka jingshakri, ka komiti ka la ai jingmut ïa ki kyrteng jong ki briew kiba dei hok ban kiew kyrdan sha u Asstt. Inspector General of Police (A) (AIG A) ban pyrkhat halor kane. Kine ki jingai jingmut ki long katkum ka jinglong rangbah ha ka kam bad ka jingdon jong ki kam kiba lait, u la ong. Shuh shuh u la ong ba u AIG (A) hadien kane u rah ïa kine ki jingai jingmut sha ka Police Establishment Board (PEB) ban bishar khatduh haba ïadei bad ka jingpynkiew kyrdan bad jingpynkynriah kam bad shisien ba la mynjur, la pynmih pat ïa ki hukum pynkiew kyrdan bad jingpynkynriah kam.
