Shillong, Risaw 18
Ka jingpynsngew paidbah lane ka public hearing jong ka Meghalaya State Pollution Control Board (MSPCB) na ka bynta ban ïoh treikam ka Meghatop Private Cement Ltd. ha ka shnong Wahïajer Narpuh, ka la jan pynïakhru pynban para trai shnong hapdeng ki sengbhalang bad ki nongpahara (Volun-teer) jong ka shnong. Kane ka la jia ha ka lynti ban leit sha ka jaka pynsngew paidbah ba la pynap lypa da ki trai shnong kiba la rah ryngkat bad ki lathi ban khang pyrshah ïa kino-kino ki kynhun kiba thmu ban leit pyrshah ïa ka public hearing.
Shipor ka la don ruh ka jingpyrshang ban ïapynibor hapdeng ki dkhot sengbhalang bad ki nongpahara jong ka shnong, hynrei na ka liang ki sengbhalang ki la kynrandien noh na ka jingthmu ban tur jubor sha ka jaka ba don ka jingïalang.
Ki sengbhalang kiba thmu ban leit sha katei ka jingpynsngew paidbah jong ka MSPCB ki la pynpaw ïa ka jingsngewsih halor ka jingshah khang lynti ha ki para nongshong shnong ban leit ïashim bynta sha ka jingpynsngew paidbah jong ka Meghatop Private Cement Ltd.
U Bah Donbok Dkhar uba dei u President ka HITO u la ong ba ki dkhot ka seng kim kwah ban ïaumsnam bad la ki jong ki paradoh parasnam, bad u la ong ba ka seng kan leit tur sha ka ophis jong ka MSPCB ha Shillong ha ka 22 tarik mynta u bnai ban pynthikna ba kan nym don shuh da kawei pat ka karkhana pynmih dewbilat ha katei ka thaiñ.
U Vice President ka FKJGP, u Bah Kitboklang Nongphlang u la ong ba ki mynder ki ïoh thapkti bad ki bor district ki ïohthiah thai namar ki pynïatyngkhuh ïa ki sengbhalang bad ki briew lajong, ban khang lynti ban leit sha ka jingpynsngew paidbah.
“Ki kompani ki la dep thied ïa ki briew ka thaiñ ban pynap na ka bynta ban khang lynti ïa ki sengbhalang kiba pyrshah ban leit sha ka jingpynsngew paidbah”, u la ong.
“Ka seng kam duh jingkyrmen lane shah rem namar ka la pyni ïa ka jingpyrshah jur, hynrei haba ki trai shnong pat ki pdiang ïa kata ngim don kyntien da kumwei pat, namar ka seng kam kwah ban ïatyngkhuh bad ki paradoh parasnam”.
U nongïalam ka FKJGP u la ong ba ka public hearing kam don jingmut shuh namar ha ka jingpynsngew paidbah, dei ban sngap ïa kiba kyrshan bad kiba pyrshah, pynban kane ka jingpynsngew paidbah kadei beit thik tang na ka bynta kiba kyrshan.
U President ka FKJGP East Jaiñtia Hills, u Deihok Sumer u la ong ba ka seng ka la leit ha katei ka jaka da ka jingthmu ban sngap ïa ka jingpynsngew paidbah, hynrei sngewsih ba la shah khang lynti ha ki briew kiba dei ki jait ki kynja lajong.
“Kane kam pat dei ka por kaba biang ban pdiang ïa kane ka jingpynsgew paidbah, namar ïa mynta hi kane ka plant ka dang dei kaba ki briew jong ngi ki shu don bynta na sharud, katba u bar Jylla udei beit ju trai, kaba mut ba ka spah ka phew hangne yn rong noh da u bar Jylla,” u la ong.
U President ka KSU Narpuh Circle, u P. Suchiang u la ong ba kane ka jingpynlong ïa ka jingpynsngew paidbah ka long ka bym khuid shuh.
“Ka seng kan ïaid shakhmat bad kan mudui hapoh ka Kashari High Court jong ka Meghalaya, namar kim shym ïaid shuh katkum ka aiñ, bad ïa ka jingpynsngew paidbah la shu leh tang ban dep rukom ban ïoh sdang ïa ka karkhana” u la ong.
