Shillong, Risaw 18
U Myntri ka Sorkar Jylla u Bah A.L Hek u la lum ïa ka jingïalang bad ki karikor kiba peit ïa ka tnat shna surok namar ka jingsniew ki surok hadien ba la jur palat ka jinghap slap ha kane ka aïom slap kynthup ka jingjulor ki surok ha ka thaiñ Pynthorumkhrah, Lyngkyrding, bad ka jinglong jingman ka surok hajan ka skul BDW tangba une u Myntri um treh ban kynnoh ïano-ïano halor ka jingslem ban pyndep ïa kane ka surok.
Haba kren sha ki lad pathai khubor ha ka Sngi Palei, u Bah Hek u la ong ba ha kane ka jingïakynduh bad ki karikor ka tnat shna surok u la bthah ïa ki ban peit ïa kane jingdonkam bad ban pyndep ban siangrong noh ha shwa ka aïom Khristmas.
Haba ïadei bad ka surok kaba dang shna hajan ka skul BDW bad slem ban pyndep, u Bah Hek u la ong ba kane ka surok ka dei kaba dang shna bad ka jingpra jong ka bynta kaba dang shna dang ha kine ki khyndiat taïew ka dei namar ka jinghap slap. Kumta u la ong ba um lah ban kynnoh ïano-ïano ha ka aïom slap.
Hynrei u la ong ba la bthah ïa ki karikor ban peit ba kane ka jingpyntrei ïa ka surok hajan ka skul BDW dei ban pyndep noh shwa ban pynlong ïa ka Jingïaseng Samla jong ka Balang Presbyterian kan ban sa long ha Nongmensong ha kane ka aïom Tlang.
