Shillong, Risaw 18
Ka Kynhun Myntri ka Sorkar Jylla ka la rai ban nang pynbha ïa ka jingpyntreikam ïa ka aiñ Meghalaya Residents Safety and Security Act (MRSSA) ha kaba yn mang mar T.2 lak ïa kawei ka district task force.
Ïa kane la ai jingmynjur da ka Kynhun Myntri ha ka Sngi Thohdieng hadien ba la ïatai halor ka jingpyntreikam ïa ka MRSSA ha kylleng ki district.
Ka Myntri Sorkar ka Kong Ampareen ka la ong ba ka Kynhun Myntri ka la ai jingmynjur ban pyntreikam ïa kawei ka skhim ha kaba yn mang T.2 lak ïa kawei ka district bad kito ki district kiba kham heh ki lah ban donkam kham bun bad kin phah ïa ka jingdonkam ban mang pisa.
U Bah Cyril VD Diengdoh, Secretary ka tnat Home (political) u la ong ba kane ka jingmang pisa ka dei ruh na ka bynta ban pyntreikam ïa ka MRSSA lyngba ki nongïalam shnong kiba donkam ïa ka kompiwtor lane laptop ba kin pynrung kyrteng ïa ki nongshongwai bad kiwei pat namar ka aiñ ka la kren shai ba donkam ban buh jingthoh ïa ka kyrteng jong ki briew kiba shongwai da kaba pyntreikam ïa ka ‘app’ khnang ba ki pulit ruh kin ïoh jingtip lang.
U la ong ba na ka liang ki nongkitkam shnong ki la pynsngew ba ki donkam ïa ki kor ki bor khamtam ka kompiwtor ne laptop ban ïoh pyndonkam ban buh ryntih ïa ki jingthoh bad ki kyrteng jong ki briew kiba sahwai ha kaba ki pulit ruh ki donkam ban ïoh jingtip.
Kumta lyngba kane ka skhim, yn lah ruh ban pyndonkam ïa ka pisa na ka bynta kiwei pat ki jingdonkam kum ha ka por ba shong jingïalang ki dkhot jong ka District Task Force.
Kane ka jingmang pisa ïa ki District Task Force kan long ruh kum ka jingpyntreikam bha ïa ka MRSSA.
