Shillong, Risaw 20
Ka BJP lyngba ki nongïalam na Delhi ka lah ban pynbna kyrtong ha ka 23 tarik, tang ar sngi ha shwa ban kut ka sngi thep kyrteng na ka bynta ka ilekshon MLA shiteng samoi ha Gambegre konstitwensi kaba la buh ban pynkut ïa ka jingthep kyrteng ha ka 25 tarik mynta u bnai.
Haba ïakren bad ki nongïalam ka BJP, ki la ïathuh ba ki don katto-katne ngut kiba paw kyrteng ban long kyrtong, hynrei haduh mynta ka dang don tang ka kyrteng u MDC ka BJP na Tura, u Bernard Marak.
La ong ba nalor u Bernard, ki dang don shuh kiba thep kyrteng ban pan tiket na ka BJP ha kaba ki nongïalam ka seng kin sa khmih bniah ïa kiba pan tiket. Ki nongïalam ki lah ban pynbna ïa u kyrtong ha ka 23 tarik.
Ka National People’s Party (NPP) ka pynïakhun da ka Mehtab Chandee A Sangma kaba dei ka kurim jong u Myntri Rangbah u Conrad K Sangma bad ka All India Trinamool Congress (AITC) ka la pynbna ïa ka kyrtong da ka MDC ka Sadhiarani Sangma kaba dei ka kurim u MLA barim ka Rangsakona konstitwensi u Zenith Sangma. Ka Congress ka la dep pynbna ïa ka kyrteng jong u Jingjang Marak kum u kyrtong ha kane ka ilekshon MLA shiteng samoi.
Ka jingthep kyrteng ka la sdang ha ka 18 tarik Risaw, bad ka sngi khatduh ban thep kyrteng kan long ha ka 25 tarik Risaw. Ka jingpeit bad bishar bniah ïa ki kot ki sla jong kiba thep kyrteng kan long ha ka 28 tarik Risaw bad ka tarik khatduh ba ki kyrtong kin weng kyrteng kan long ha ka 30 tarik Risaw.
Ka sngi ban thep vote kan long ha 13 tarik Naiwieng 2024 bad ka sngi ñiew vote kan long ha ka 23 tarik Naiwieng 2024. Ki kam baroh kiba ïadei bad ka ilekshon shiteng samoi dei ban pyndep lut hapoh ka 25 tarik Naiwieng, 2024.
