Shillong, Risaw 20
U Myntri Rangbah ka Jylla, u Conrad K. Sangma ha ka Sngi Saitjaiñ u la plie ïa ka Vocational Training Institute (VTI) ha Synod College, Shillong kum ka jingrakhe ïa ka ‘Diamond Jubilee’ jong ka kolej.
Haba kren ha kane ka sngi, u Myntri Rangbah u la ai jingïaroh ïa ka Synod College halor ki sienjam bapher-bapher kiba ka kolej ka la shim ha kine ki phew snem ba la leit noh.
U la ong ruh ba ka kolej ka la pynlong ïa ki ‘Seminar’, ki jingïalang bad kiwei-kiwei ki prokram, bad ka la mih ruh shakhmat bad ki jingai jingmut sha ka Jylla halor ki jingeh bapher-bapher ba ïadei bad ka imlang-sahlang. Haba pynkynmaw ïa ka jingïadei u kpa jong u, u P.A. Sangma (Bam Kwai ha Dwar U Blei) bad ka kolej, u Myntri Rangbah u la ong, “Ka long kaba donkam eh ba ngin pynkupbor ïa ki samla jong ngi. Ki kam bad ki sienjam bapher-bapher ba la shim da ka kolej ki dei ban pynwandur ïa ka jingmut-jingpyrkhat jong ki khun samla jong ngi. Ngi dei ban trei da ka rukom pyrkhat ka ban pynïaid beit ïaid ryntih ïa ka bor kaba tei jong ki samla.”
Haba kyrpad ïa ka kolej ban shim kabu ïa ka ‘Meghalaya Skills Programme’, u Myntri Rangbah u la pyntip ba ki seng bapher-bapher ha ka Jylla ki la ïasnohktilang bad ka Sorkar na bynta ban ai jinghikai ha ka liang ki kam ki jam. Shuh shuh u la bynrap ba ka dei ka jingjop kaba mar kylliang namar ba ka Sorkar ka la sdang ïa ka mishon ban pynkupbor ïa ki samla jong ka.
“Ka jingthmu jong ka ‘Meghalaya Skills Programme’ ka long ban ai jinghikai bad ka jingbtin lynti. Ngi pynshlur ïa ki shlem jingpule bad kolej ban ïatreilang bad ka Sorkar bad ban ai jinghikai ha ka liang ki sap ki phong,” ong u Sangma.
