Shillong, Risaw 20
Ka long kaei-kaei kaba sngew lyngngoh ban tip ba ki don katto-katne ki briew kiba la pyni paidbah ïa ka phlim ‘Onataah’ ha ka 18 tarik u Risaw ha shlem treikam jong ka Laitkroh Block khlem da ïoh jingbit na ki nongpynmih ne ki nongshna jong kane ka phlim.
Kane ka jingleh jong kine ki briew ne la ki dei na kano-kano ka kynhun ruh ban pyni ïa kane ka phlim khlem da ïoh shwa ïa ka jingbit na ki nongshna ne ki nongpynmih ïa kane ka phlim ka long kum ka jingbym burom ïa ki bad kumjuh ruh ka long kumba tuh im-im peit-peit ïa ka umsyep jong ki puron ki tyngshop bad baroh kiba la trei shitom ban pynmih ïa kane ka phlim khamtam eh ba kane ka phlim ka la wan rah ruh ka nam ïa ka Jylla da kaba ka la ïoh ïa ka khusnam National Award ha u snem 2016.
Haba ïakren bad u Director kane ka phlim u Bah Pradip Kurbah, u la pynpaw ïa ka jingsngew lyngngoh ba ka don kum kata ka jingpyni ïa ka phlim jong u ha shlem treikam jong ka Laitkroh Block namar u la ïathuh ruh ba ym shim la don mano-mano ruh ban pan jingbit halor ka jingpyni ïa kane ka phlim ha kane ka shlem treikam jong ka Laitkroh Block.
Shuh shuh u Bah Kurbah u la bynrap ruh ba lada dei ba tang ba ki pan jingbit shwa bad pyntip ruh ïa kaei ka daw ba ki kwah ban pyni paidbah ïa kane ka phlim, lehse ka lah ban long da kumwei. U la ong ruh ba u long uba kloi ban pyni ïa ki phlim jong u lada ki wan ha ka lynti kaba dei bad wat ban ïa synñiang lang ha ino-ino i bynta lada ki kwah ban pyni ïa ki phlim ki jong u na ki bynta ki daw kiba bha.
Une u rangbah u la bynrap ruh ba kane ka jingleh jong kine ki briew ka long ka bym sngewtynnad bad kaba pyni ruh ïa ka jingbym kheiñ snep bad burom ïa ki kam jong ki nongshim bynta lem bad ki nongshna bad ki nongpynmih ïa kane ka phlim.
Na ka liang u Bah Merlvin Mukhim uba dei u tyngshop pdeng jong kane ka phlim, u la pynpaw ba ym tang ba u sngew kyndit hynrei u la pynpaw ruh ïa ka jingsngewsih ban tip ba la pyni paidbah ïa ka phlim ‘Onataah’ ha Block Office kaba don ha ka shnong Laitkroh khlem ka jingpan jingbit lane kynjoh ktien na ki nongshna bad nongpynmih ïa ka.
Shuh shuh u Bah Merlvin u la ong ruh ba shimet kum u tyngshop ba ïa don bynta ha ki phlim Khasi u sngew ba kane ka jingleh ka dei ban pynrem jur namar ka long kaei- kaei kaba bakla. “Nga sngewthuh bad tip ba ki bun ki briew kylleng ka Jylla kiba sngewtynnad ban peit ïa ki phlim Khasi, khamtam ki phlim ba shna da u Bah Pradip Kurbah, hynrei ka don ka rukom kat kum ki aiñ ki kyndon (The Cinematograph (Amendment) Act, 2023 bad ka Copyright Act, 1957) ban ïoh ban pyni bad peit ïa ki. Nga kyrmen ba kum kine ki jingleh beaiñ leh biej kan ym jia shuh nangne shakhmat”, la bynrap shuh shuh une u tyngshop.
Haba ïakren bad uwei na ki dkhot jong ka Fraternity Art Cine Entertainment Shillong (FACES) u Bah Elmer R War, une rangbah u la pynrem jur ïa ka jingleh jong kine ki briew kiba pyni khlem ïoh jingbit ïa ka phlim ‘Onataah’ ha Laitkroh Block bad u la buh jingkylli ruh ïa ki ba kumno kin sngew lada ma ki ki shah knieh jubor ïa ka umsyep ka jong ki kaba ki la trei shitom ban ïoh ïa ka.
Shuh shuh u Bah War u la pynrem ruh ïa kane ka jinglong jong katto-katne ki briew ba ki nud ban leh ïa kane ka kam. U la pynkynmaw ruh ba ki don ki briew kiba kwah tang ban ïoh jingmyntoi shimet khlem da trei shitom ki la nud wat ban knieh jubor ïa ka umsyep jong kiwei namar ki don ki briew kiba la nud ban thep ïa ki phlim Khasi bad Pnar ha YouTube Channel jong ki khlem da don ka jingsngew ïa kaei kaba ki leh. Ïa kane u la pynpaw na ka jinglap ka jong u hi ha ki katto-katne ki YouTube Channel kiba la nud ban thep ïa ki phlim Khasi bad Pnar kum ka phlim ‘Ka Thong Ïong Nga’ jong i Kong Simi Khongthiang, ka phlim ‘Nabon’ ba la pynmih da ka Jingïaseng Samla KJP Synod Sepngi lem bad kiwei kiwei.
Ha kajuh ka por ka Fraternity Art Cine Entertainment Shillong ka la maham tyngeh ïa kine ki ‘riew shim kabu ba lada ki bteng ban leh ïa kine ki kam beaiñ, na ka liang ka kynhun kan sa ïaid lyngba ka aiñ bad kan dawa ruh ïa ka bai mynraiñ khmat na kine ki ‘riew shim kabu.
