Shillong, Risaw 21
Ka long kaei-kaei ka ban pynsah jingkynmaw ïa ka Khasi Hills Autonomous District Council (KHADC) ha kaba na ka liang ka Ïing Dak ka Sorkar Pdeng ka la pynrung ïa ka dur jong ka KHADC ha ka ‘Special Cover’ ha kaba ha kane ka jingsop la thoh shaphang KHADC ha ki lai tylli ki ktien kata ha ka Hindi, Khasi bad Phareng.
Ïa kane ka ‘Special Cover’ la pyllait paidbah ha ka 21 tarik u Risaw 2024 ha ka ‘Philatelic Exhibition Meghapex 2024’ ba la pynlong da ka tnat Ïing Dak ha ryngkat ka jingïatreilang bad ka Meghalaya Postal Division ha ka State Convention Centre, Shillong.
Ïa katei ka ‘Special Cover’ la pyllait paidbah da u Chief Executive Member (CEM) jong ka KHADC, Bah Pynïaid Sing Syiem ha ka jingïadonlang jong u Lamphang ka KHADC, u Bah Lamphrang Blah, ka Director General of Police (DGP), ka Kong Idashisha Nongrang, u Chief Postmaster General North East Circle nalor kiwei-kiwei.
Haba kren bad ki nongthoh khubor, u Bah Pynïaid Sing Syiem u la pynpaw ïa ka jingsngewkmen kaba khraw ba ka Ïing Dak ka la shim ïa ka dur jong ka KHADC kum ka ‘Special Cover’ bad kane kan pynlong ïa kiwei ki Jylla ha ka Ri India ban tip shaphang ka KHADC. U Bah Pynïaid u la ong ba ka ‘Philatelic Exhibition Meghapex 2024’ ka long kaba kongsan bha namar lyngba kane ka jingpyni ïa ka KHADC, la pynrung ha ka Postal Service of India kum ka Special Cover ha kaba la shon haduh 2000 kopi.
U la ong ba ïa ka Special Cover jong ka KHADC yn phah sha ka National Museum ha Delhi da u Postal Master jong ka North East Circle ïa kaba yn sa phah pat sha ka District Council ban die ïa kine ki muhor bad ka Council kan lah ruh ban pyndonkam ïa kine ki muhor.
“Da ka jingpynrung ïa ka KHADC ha ka Postal Service lyngba ka Special Cover ka long ka jingkyrkhu namar ba kan long ka jingithuh da ka Sorkar India namar ka Special Cover ka batai shaphang ka KHADC ha ka ktien Hindi, Phareng bad Khasi”, bynrap u Bah Pynïaid.
