Shillong, Risaw 21
Ka Sorkar Jylla ha ka 10 tarik Nailur mynta u snem, ka la ujor da ka ejahar pyrshah ïa ki kontraktor jong ki kompeni shimet bad ki karikor (engineer) ka tnat Public Works Department (PWD) halor ka jingkynnoh bamsap jong ka jingbamsap ïa ka pisa kaba haduh T.2366.77 klur ka jingmang pisa na ka jingshna ïa ka surok Shillong-Nongstoiñ-Rongjeng-Tura.
Ïa kane ka ejahar la mudui da u Chief Engi-neer (National Highway) PWD (Roads) ha ka thanat Shillong Sadar, kaba long ruh katkum ka jingbthah jong ka Sorkar Jylla. Ka bynta kaba la pan ban tohkit halor kane ka kam, ka dei naduh ka 20 tarik Nailur, 2010 haduh ka 10 tarik Nailur, 2024.
Ha kane ka jingujor, ki briew kiba la shah jer kyrteng ki dei u B Seenaiah & Company Ltd (Project) Ltd (BSCPL) kaba don ïa ka ophis ha Khairatabad, Hyderabad lyngba u Managing Director u Bollineni Seenaiah, ka kompeni C&C Construction Ltd lyngba u Managing Director Charanbir Singh Sethi kaba don ïa ka ophis treikam ha Gurgaon, Haryana, bad ka kompeni M’s BSC C&C Joint Venture kaba don ïa ka ophis treikam ha Gurugram, Haryana.
Katba ki karikor ka tnat PWD kiba la shah jer kyrteng ha ka ejahar ki kynthup ïa u MR Sangma, Chief Engineer bad baroh ki Chief Engineer ha shuwa jong u, kaba dei hapdeng ka por ba ai kontrak ka PWD, National Highway, u Executive Engineer (NH) barim ka tnat PWD lem bad ki heh bad ki nongtrei ka tnat PWD bad ki kompeni shimet ki bym tip kyrteng. U Dharamukkala Srinivasa Rao, uba trei bad ka BSC C&C JV, Gurugram, Haryana ruh u la shah jer kyrteng ha kane ka ejahar.
Ïa kane ka mukotduma la pynrung hapoh ka kyndon 120B, 409, 420, 465, 468, 471, 477(a) jong ka IPC bad hapoh ka kyndon 7, 8, 9, 13 (1) (c), (d) bad (e) pule lang bad ka kyndon 13(2) jong ka Prevention & Corruption Act, 1988.
Katkum ka ejahar, u Chief Engineer ka PWD (National Highway) u la ong ba u la ïohbor na ka Sorkar ban ujor ïa ka ejahar pyrshah ïa ki kontraktor/kompeni bad ki nongmihkhmat jong ki nalor ki karikor bad ki ophisar ka tnat PWD (National Highway).
Ka ejahar ka ong ba ki jingshisha ki la mih pyrthei ha ka mukotduma ïakajia (arbitration case) ba la tiañ bishar da ka Arbitral Tribunal ba kynthup ïa u Justice (Retd) VB Gupta, Judge barim ka Delhi High Court nalor u President Arbitrator KK Jalan, IAS, ba la shongthait, u Co-Arbitrator Ravindra Kumar Srivastava, IAS, kaba la pynpaw ba ki don shibun ki jingleh bym hok bad don bun ki briew kiba la leh ïa ka kam bymman na kane ka jingai kontrak ban shna ïa kane ka surok.
La lap ha ka por ba pynlong ia ka jingbishar ba katto katne ki kam runar bad ki jingbym leh hok la leh da ki briew kiba la jer kyrteng kham mynshwa bad kumjuh ruh da ki briew ki bym tip kyrteng bad ki heh kiba la ïasuh buit para ma ki ha kaba ïadei bad ka jingleh tuh ïa ka pisa u paidbah.
Lah ban kdew hangne ba ka Ministry of Road Transport & Highway (MoRTH) ha u 2010, ka la khot ïa ka tender ban shna ïa ka surok 2-Lane jong ka surok NH-44 Shillong-Nongstoiñ bad Nongstoiñ-Rongjeng-Tura. Ïa kane ka tender la khot hapoh ka Special Road Development Programme-NE (SARDP-NE) jong ka Sorkar Pdeng.
Ka PWD (National Highway) ka Jylla, ka dei kaba pyntrei ïa kane ka projek na ka bynta ka MoRTH.
U Chief Engineer ka PWD, Highway Meghalaya na ka bynta ka Sorkar Jylla, u la ïasoi ïa ka jingïateh kular bad ka kontraktor M/s BSC C&C kum ka Joint Venture ha ka 21 tarik Risaw 2011 ha ka mang tyngka ba T.1303,83,45,181.
Ïa kane ka dor kontrak la pynthymmai na ka por sha ka por bad la pynkiew sha ka T.2366.77 klur bad ïa kane ka kontrak la pyndep ha ka 15 tarik Nohprah 2017 kaba la ïaid palat ïa ka por bala buh nyngkong ban pyndep ha ka 6 tarik Lber, 2014.
U kontraktor lyngba ka shithi ba la thoh ha ka 23.04.2015 u la pan thung ïa u nongpeit bniah ia ki jingeh ne ka Dispute Review Expert (Board)-I katkum ka kyndon 24 jong ka General Conditions of Contract (GCC) bad u la ai ïa ka jingdawa ba nyngkong kaba kot sha ka T.41,89,30,688 ha kaba ïadei bad ka jingsiew kaba dei ban siew na ka bynta ka bitumen, ka bai trei, ka sut na ka jingpynslem ban siew bad kumjuh ruh ka jinglut ha ka jingshah mudui.
U Bah M Phanbuh, Chief Engineer (NH), PWD (Roads) lyngba ka shithi kaba 16.05.2016 sha ka Dispute Resolution Board (DRB) u la kyntait ïa kawei pa kawei ka jingdawa kynthup ïa ka jingdawa sut bad ka jingpynslem ban siew. La pynpaw shai ba u kontraktor un ïoh ïa ka jingsiew tang katkum ka jingïateh.
Ka Dispute Resolution Board (DRB)-I ka la ai jingmut ha ka 25.09.2016 ban siew T.5,69,00,928 na ka bynta ban pyndonkam ha ka account jong ka bitumen, T.17,75,39,464 na ka bynta ban siew ïa ka labour cess bad khatduh eh T.58,91, 16,450 sha ka sut halor ka jingpynslem ban siew ha ka rukom pyndap man u bnai.
Ha kane ka ejahar la pyni ruh ba ki don bun ki khep kiba pyni ïa ka jingïatreikam kaba la leh sop sop hapdeng ki kontraktor jong ki kompeni shmet bad ki karikor ka tnat PWD (NH) kaba lam sha ka jingduhnong kaba khraw ïa ka pisa u paidbah.
Kine ki jingduhnong jong ka pisa u paidbah ka la wan ha ka dur jong ka jingthied ïa ki tiar ai sngewbha, ka jingpyndih kyiad ba rem dor, ka jingthong pisa da ki kontraktor ïa ki karikor ka PWD, ïa kiba ki jinglut jingsep baroh la kynthup lang ha ka jingkam jong ki kontraktor ha ka mukotduma arbitration na ka bynta ban siew da ka Sorkar Jylla.
Kine ki jingpynlut ki kynthup ïa ka jingsiew ïa ka pisa ban thied tiar ai sngewbha ïa ki heh ophisar ka Sorkar, ka jingai pisa ban leit jingleit Shillong-Guwahati da ki heh ka IOCL, ka jingai pisa ban thied ïa ki baje HELOIS-Titan sha ki bor Sorkar, ka jingsiew pisa sha ka Hotel Polo Tower na ka bynta ka jingrakhe ïa ka Engineers Day ka tnat PWD, ka jingsiew pisa ban thied kyiad (Black Dog) ïa ki heh karikor, ka jingsiew pisa ban ïabam sngewbha da ki nongtrei PWD ha Bamboo Hut Restaurant ha ka jingai khublei khatduh ïa kiba shongthait, ka jingsiew pisa ïa ka bai bam ha City Hut Dhaba na ka bynta ki heh PWD, ka jingsiew pisa ban thied kyiad ïa ki heh ophisar, ka jingpynlut ban thied Mobile Tab (Samsung) ïa ki heh ophisar ha ka por Khristmas bad kumjuh ruh ha ka jingrakhe ïa u snem thymmai 2015, ka jingai pisa ba T.5 lak sha ka Nongkhnum We Care Society ba la bthah da ki heh Sorkar, ka jingsiew pisa ban thied ïa ka Mobile Samsung Phone bad kiwei kiwei.
Kine ki dei ki nuksa kiba la pyni shai kdar ba ki ophisar, karikor ki la ïaleh sop-sop bad ki kontraktor ym tang ha kaba thoh, shukor hynrei kila shim ruh ïa ki sienjam ba bakla, kaba lam sha ka jingduhnong kaba khraw ïa ka pisa u paidbah, ong ka ejahar.
