Shillong, Risaw 21
Wat la ka Election Commission ka la pynmih ïa ka jingpynbna ha ka 18 tarik mynta u Risaw na ka bynta ka jingthep kyrteng ha ka ilekshon MLA shiteng samoi, hynrei ka jingthep kyrteng ki kyrtong ka dang jlam ne kynjah haduh mynta.
Haba ïakren bad u Returning Officer na bynta ka ilekshon shiteng samoi ha Gambegre, u la ong ba haduh mynta, ym pat don mano-mano napdeng ki kyrtong kiba wan ban thep kyrteng.
Ka jingthep kyrteng kan kut ha ka 25 tarik mynta u Risaw, bad ka jingpeit bniah ïa ki kot ki sla kan long ha ka 28 tarik. Ka tarik khatduh ban weng kyrteng ki kyrtong na ka jingïakhun ka dei ha ka 30 tarik.
Ka jingthep vote kan long ha ka 13 tarik Naiwieng bad ka jingñiew vote kan long ha ka 23 tarik Naiwieng.
Ha kawei pat ka liang, ka tyllong khubor ka ïathuh ba ka kyrtong ka National People’s Party (NPP) ka Dr Mehtab Chandi A Sangma kan leit thep kyrteng ha u Returning Officer ha Tura ha ka 24 tarik ha kaba yn synran lang da ki heh nongïalam ka NPP kiba kynthup ïa u Myntri Rangbah u Conrad K Sangma, ki Symbud Myntri Rangbah, ki Myntri, MLA bad kiwei kiwei ki nongïalam.
Kiwei pat ki kyrtong ki ban ïakhun ha kane ka ilekshon MLA shiteng samoi ha Gambegre konstitwensi ki long ka Sadhiarani Sangma kaba dei ka kyrtong ka TMC bad kaba dei ruh ka MDC, nalor u kyrtong ka Congress, u Jingjang Marak. Ka BJP haduh mynta ruh kam pat pynbna kyrtong.
Ka jingdonkam ban pynlong ïa ka ilekshon MLA shiteng samoi ha Gambegre konstitwensi ka dei hadien ba u MLA ka Congress uba mihkhmat ïa kane ka konstitwensi u Saleng A Sangma u la iehnoh kam namar ba u la shahjied kum u MP ka Tura mynta u snem.
