Shillong, Risaw 21
Ka jingshah prong tuh jong ki ïing ki sem bad ka jingshah tuh jong ki arshaka ki dang bteng beit jan manla ka sngi na kawei ka jaka sha kawei pat. Dang ha kine ki sngi ruh ka la don biang ka jingshah prong tuh jong kiba bun tylli ki ïing bad ka jingshah tuh ki arshaka.
Katkum ka khubor kaba la ïoh na ki pulit la ong ba u Alvin Slong u la ujor ba ha ka 17 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AA-2892 na ka thaiñ Lower Lachumiere, Shillong.
Ha kawei pat ka khubor na ki pulit la ong ba u Bah Banshailang Mylliemngap u la ujor sha ki pulit ba ha ka 18 tarik mynta u bnai, ha ka por 11 baje eiei mynstep, ar ngut ki runar bym lah ban ithuh, ki la prong tuh ïa ka ïing sah jong u, kaba don ha Lumbasuk-A Lawjynriew, Nongthymmai, Shillong bad ban tuh ïa ki juti bad ki jaiñ kiba shongdor kumba T.40 hajar. La ong ba ïa kane ka jingjia baroh jong ka jingshah tuh, la dep ban ïoh ring lyngba ka kor CCTV.
U John DB Singh u la ujor ba ha ka miet hapdeng jong ka 18 bad 19 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-W-4582 na Police Bazar, Shillong.
Ha kawei pat ka khubor, ka Anjum Ara Naheed ka la ujor ba ka miet jong ka 18 tarik mynta u bnai, ki runar bym lah ban ithuh ki la prong tuh hapoh ka ïing jong ka, kaba don ha Keating Road, Shillong bad ban tuh ka pisa kaba kot haduh T.4,01,500/-.
Ka Miko Kaur ruh ka la ujor ba ha ka 17 tarik mynta u bnai, ki runar bym lah ban ithuh ki la prong tuh ïa ka ïing sah jong ka, kaba don ha Harijan Colony, Ïewduh, Shillong bad ban rah tuh ïa ka ksiar. Kane ka nongujor ka la suba ba uwei u briew uba dei u nongshong shnong kane kajuh ka dong, ba u lah ban donkti ha kane ka kam tuh.
U Waltrynight G Momin u la ujor ba ha ka step jong ka 18 tarik mynta u bnai ha ka por kumba 3 baje, ki runar bym lah ban ithuh ki la tuh ïa ka arshaka jong u, kaba don ïa u registration number ML07-C-2678 na ka shnong Rangmalgre kaba hap hapoh ka Rongsak OGC ha East Garo Hills. Ha kawei pat ka khubor, u Joel Thangmuanlun u la ai ka jingujor ba ha ka 15 tarik mynta u bnai, ki runar bym lah ban ithuh ki la prong tuh ïa ka ïing sah wai ka jong u, kaba don ha ka shnong Kathalbari ha West Garo Hills bad ban tuh ïa kawei ka Laptop kaba shongdor haduh kumba T.20 hajar.
