Tura, Risaw 21
U MDC ka Tura uba dei ruh u Vice-President ka BJP, u Bernard Marak, u la thoh sha u Myntri Sorkar Pdeng ka tnad Tribal Affairs, u Jual Oram ban kyrpad tuklar halor ki jingeh ba la mad da ki nongshong shnong ‘Schedule Tribe’ jong ka thaiñ ha ka ban ïoh pdiang ïa ka baibam na bynta ki jingpule jong ki.
Ha ka shithi sha u Myntri, u Marak u la pynpaw ba la kyntu ïa ki samla pule ban pynbiang ïa ki syrnot jingïoh kamai (Income Certificate) bad ki ‘Affidavit’ na ki bor ba dei khmih ka Jylla ha ka jaka jong ki ADC – kiba dei hok ki bor ba dei khmih jong ki ST ha ka thaiñ.
“Dei ban pdiang ïa ka ‘Income Certificate’ bad ki ‘Affidavit’ ba la ai da ka ADC na bynta ki samla pule ST ha jaka ki kot ki sla ba la ai da ki heh Sorkar ka Jylla kiba mihkhmat ïa ka Jylla (General). Ki samla pule ki la pynpaw ïa ki jingeh jong ki halor ki jyrwit-jyrwat kiba ki ïakynduh bad ki jingsiew ba-heh dor, ha kawei ka liang kaba la khang lad ïa katto-katne ban thep naba kiba bun ki samla pule ki wan na ki longïing ba duna ka ïoh ka kot,” ong u Bernard.
U la bynrap ruh ba ki samla pule ki la ud ruh ba ka baibam jong ki ka dang sahteng naduh u snem ba la dep bad ki bor ba dei khmih ki kyntait ban pdiang ïa ki ‘phone call’ jong ki.
“Nga kyntu ïa phi ban shimkhia lem kyrkieh ïa kane ka kam, da kaba pdiang ïa ki jingshisha ka Riti Synshar ka ri bad ki jingeh kiba ki samla pule ST ki ïakynduh kumjuh ban jubab kloi katba lah. Ki kot ki sla kum ka ‘Income Certificate’, ki ‘Affidavit’ bad kiwei-kiwei ba la ai da ki MDC/ADC na bynta ki samla pule ST kiba dang thep. Khatduh eh, ka Jylla kam dei ka bor ba dei khmih jong ki Schedule Tribe bad kam dei ban pynbor ïa ki samla pule jong ngi ban jngai na ka bor jong ka Riti Synshar jong ki – ki ADC,” ong u Bernard ha ka shithi jong u. Ïa kane ka shithi la phah ha ka Sngi U Blei.
