Shillong, Risaw:
Ka Amazon India ka la pynbna ïa ka jingpyllait paidbah ïa ka Smbhav Hackathon 2024, kaba long ka jingïakob jong ka ri baroh kawei ban thaw ïa ki Technology thymmai bad kiwei ki buit stad treikam ba la pynïaid katkum ka jingstad AI na bynta ki kam khaïi pateng kiba rit bad ba pdeng ha India ne Indian small and medium businesses (SMBs) ha ka e-commerce.
Kane ka Hackathon ka long ka jingïakob ïa kaba la pynlong hashwa ban sdang ka Amazon Smbhav 2024, kaban long ka sien kaba san ban pynlong ïa ka jingïalang ba man la u snem ha India, bad la khot ruh ïa kito ki nongshem ïa ki buit thymmai ha kylleng ka India ban noh synñiang ban pynkiew jong ka ïoh ka kot ha ki liang Digital ha India.
Ka Amazon India ka la ïatehlok bad ka Startup India, DPIIT, National Innovation Foundation (NIF) – India, bad ka NIF Incubation and Entrepreneurship Council (NIFientreC) ban kot sha ki nongshem buit thymmai ha kylleng ka ri. Ki nongïashim bynta ki lah ban ïoh jop bad ïoh leit sha Headquarters jong ka Amazon kaba don ha Seattle bad ki lah ruh ban ïoh ki song pisa kaba shong dor haduh 10 lak tyngka, lem bad ka jingïohlad ban ïoh shuh shuh ïa ki jinghikai bad ban ïoh ïa ka kabu ban ïatreilang bad kiwei pat.
U Amit Nanda Director, Selling Partner Services, Amazon India, u ong, “Ka karkhana jong ka kam khaïi pateng lyngba ka e-commerce ka la nangkiew, bad kumjuh ruh ka long ka jingdonkam ïa ki kam khaïi pateng kiba rit kiba kwah ban pynkylla Digital bad nang kham pynheh ïa ka kam, Ka long kaba donkam ba ngin nang ïai wad ïa ki lad ki lynti bad ki buit thymmai khnang ba ngin ai lad bad ïarap ïa ki nongseng kam lajong da ki lad ai jingïarap kiba kyrpang kiban lah ban weng ïa ki jingeh jong ki “
Ki tarik na bynta kane ka Hackathon kaba kynthup ruh ïa ka jingpyllait ïa ka jinglah ban thep ne Apply kaba la long naduh ka 14 tarik u Risaw, ka tarik ba khatduh ban phah ïa ki jingai jingmut ne ki buit treikam kan long ha ka 14 tarik Naiwieng, ka jingpynbha ïa ka jingjied ïa kito kiba shah jied ban pyni ïa ki jingmut ne ki buit kan long ha ka 18 tarik Naiwieng, ka jingphah ïa ki jingshna ba nyngkong kan long ha ka 24 tarik Naiwieng, ka ‘Virtual Demo Day’ ne ka jingpyni ïa ka rukom treikam ïa kaba lah ban leh lyngba ka Video kan dei ha ka 5 bad 6 tarik Nohprah, bad ka jingpynbha ïa ki nongjop kan long ha ka 10 tarik Nohprah ha Amazon Smbhav 2024.
