Shillong, Risaw 21
Ka Kynhun Myntri (Cabinet) ka Sorkar Jylla kan leit pynlong jingïalang biang ha ki district bapher-bapher, bad mynta ka sien, ka jingïalang jong ka Kynhun Myntri yn pynlong ha North Garo Hills district ha ka 23 tarik.
La ong ba ka jingïalang jong ka Kynhun Myntri kan long ha Resubelpara kaba dei ka nongbah jong ka North Garo Hills district ha ka por 2.30 nohphai sngi.
Ïa ka jingïalang ka Kynhun Myntri la ju pynlong ruh ha kiwei ki district kum ha Tura, West Garo Hills district bad ha Jowai, West Jaiñtia Hills district ha ki por ba la leit.
Ki Myntri Sorkar bad ki ophisar kin sa mih na Shillong ban leit sha Resubelpara ha ryngkat ki kot ki sla kiba donkam ban ïatai ïa ki mat hapoh ka jingïalang ka Kynhun Myntri. Kin don ki Myntri Sorkar bad ki ophisar ki ban sa mih lypa ha ka Sngi Ba-ar, ki don pat ki ban sa mih ha ka por step phyrngab jong ka Sngi Balang.
Ka tyllong khubor ka ïathuh ba ki Myntri Sorkar kiba kynthup ïa u Myntri Rangbah, u Conrad K Sangma, ki Symbud Myntri Rangbah bad kiwei ki Myntri kiba dang leit jingïalang sha Delhi, kin wan beit-beit sha Resubelpara na ka bynta ka jingïalang ka Kynhun Myntri.
La ong ba kin don ruh ki Myntri Sorkar ki ban sa leit sha Tura ynda la wai ka jingïalang ka Kynhun Myntri na ka bynta ban synran bad donlang ha ka jingthep kyrteng na ka bynta ka ilekshon MLA shiteng samoi ha Gambegre konstitwensi. Ki don katto-katne ki mat kiba la pynkhreh ban ïatai bad shim rai ha ka jingïalang ka Kynhun Myntri ha Resubelpara. Kawei na ki mat ka dei halor ka jingwanrah ïa ka aiñ na ka bynta ka jaka pule doktor jong ka skulbah shimet USTM ka ban sdang noh shen ïa ka jinghikai naduh mynta u snem.
