Shillong, Risaw 21
Ka Achik Conscious Holistically Integrated Krima (ACHIK) ha ka Lah Sngi U Blei ka la thoh sha ka ophis Deputy High Commission for the People’s Republic of Bangladesh, Kolkata ban pynrem jur halor ka jingshah thombor ba dang shen jong ki longïing Garo ha Babelakona, Bangladesh.
“Ka ACHIK kum ka seng ka thoh sha phi na ka bynta ka jaidbynriew Garo ha ka pyrthei da ka jingsngewkhia bad jingsngewsih jur halor ka jingshah thombor ba shyrkhei jong ar tylli ki longïing Garo, kynthup ïa u Bisso Mree, ka Eva Mree, bad u Stanton Mree, ha Babelakona, Bangladesh, ha ka 15 tarik Risaw, 2024,” ong ka seng ha ka shithi.
Ka seng ka la kdew ruh ba ka jinglong shyrkhei jong katei ka jingshah thombor ym tang ba ka la pynkyndit ïa ki paidbah Garo hynrei ka la wanrah ka jingsngewkhia kaba khraw halor ka jingshngaiñ bad jinglong-jingman jong ki Garo ha Bangladesh.
“Ki Garo, namarba ki dei kawei na ki jaidbynriew trai-ri ha Bangladesh, ki la noh synñiang la slem bah sha ka lariti bad ka imlang-sahlang jong ka ri. Hynrei ki jingjia kiba kum kine ki pyni ïa ka dur ka bym itynnad haba ïadei bad ka jingbym shngaiñ bad jingshah thombor kaba ki jaidbynriew trai-ri trai-muluk ki ïai bteng ban mad,” ong ka seng.
Ka seng ka la ong ruh ba kiba kum kine ki jingthombor ym tang ba ki pynkheiñ ïa ki hok longbriew-manbriew ba kongsan hynrei ka long ruh ka jingthombor ïa ka burom bad ka rukom im jong ki jaidbynriew Garo.
“Ngi pynrem jur ïa kane ka jingleh ‘riewkhlaw bad dawa ban pynngat ha ka aiñ ïa kito kiba donkti khlem da pynslem. Dei ban pynlong ruh ki jingtohkit kiba kloi bad ki bym shah liang ban pyntikna ïa ka jingkitkhlieh bad ban khang ïa kiba kum kine ki jingshah thombor pyrshah ïa ka jaidbynriew Garo hadien-habud,” ka la ong.
Haba ban jur ba dei ban buh hakhmat eh ïa ka jingïada bad jingshngaiñ jong ki lanot, ki bahaïing hasem jong ki, bad baroh ki Garo kiba don ha Bangladesh, ka seng ka kyntu ruh ïa ka Sorkar Bangladesh ban shimkhia ha ka ban ïada ïa ki jaidbynriew trai-ri jong ka, kynthup ïa ki Garo, na ka jingshah thombor, jingshah ñiew beiñ, bad jingshah kyntait.
“Ka imlang-sahlang ha kylleng ka pyrthei ka peit bniah ïa kane, bad ka long kaba kongsan ba ka Bangladesh kan bat ïa ka kular jong ka haba ïadei bad ki hok longbriew-manbriew, ka hok, bad ka jingïalong ryngkat na bynta baroh ki nongshong shnong, khlem da kheiñ jaidbynriew,” ong ka ACHIK.
Shuh shuh ka la bynrap, “Ngi shaniah ba phin pynsngew ïa ka jinglong khraw jong ka jinglong-jingman sha ka Sorkar jong phi bad ban pyntikna ba ka hok kan long kaba kloi. Ka long kaba donkam eh ba ki Garo ha Bangladesh kin ïoh ïa kajuh ka jingïada bad ki hok kumba ïoh lem kiwei pat ki nongshong shnong hapoh ka ri.”
