Nongstoiñ, Risaw 21
U President ka Khasi Students’ Union (KSU) Sengkmie, samla Lambok -star Marngar u la ong ba ka Sorkar India mynta ka la ïaleh ban tynruh biang kumno ban ïoh tih bad khlong ïa u marpoh khyndew u Uranium napoh Domïasiat ha South West Khasi Hills District.
Une u Nongïalam ka KSU u la kren bad pynpaw ïa kane, ha ka jingïalang kynmaw burom ïa ka lyngkhuh sngi ïap kaba 36 jong u Syiem Wickliffe, u Syiem Khynnah jong ka Nongstoiñ, kaba la pynlong ha ka Lah Sngi U Blei ha ïew Nongstoiñ.
U samla Lambokstar u la ong, “Dang ha kine ki khyndiat sngi la don kiba ïathuh ban ong peitngor bha ka Sorkar India mynta ka ïaleh ban tynruh ka ïaleh ban ïa sylla ka ïaleh ban thied ïa ki briew ban pynsngewthuh bakla tang kumno ban ïoh tih noh ïa u Uranium napoh Domïasiat bad kiwei pat ki jaka bapher-bapher hapoh ka Bri u Hynñiewtrep, hynrei nga kwah ban kren shai ha kum kane ka sngi, ko Sorkar India phi la dep thombor ha ka mynnor, phim shym la sngap ïa ka jingud-jingnam jong ki paidbah ka bri u Hynñiewtrep ha kato ka por, wat pyrshang pat ban wan hiar thma sa shisien ïa ka khyndew ka shyiap jong ka jaidbynriew.”
U la ong, “Kum ki khun samla ngim don tiar siat, ngim shym la don suloi, ngim shym la don kuli hynrei ngi don tang ka jingim bad kata ka jingim ryngkat bad ka snam na ka bynta ban shakri bad ban sop ban spaiñ ïa ki dak mong jong ka ri bad ka jaidbynriew hi baroh kawei.”
“Nga phah ïa kane ka khubor sha ki khun samla ha kylleng ka bri u Hynñiewtrep, to ngin mih lang shakhmat ban shim lang ïa kata ka lyngkor ban kit ban bah na ka bynta ka ri bad ka jaidbynriew hi baroh kawei. Nga sngew ba ka por bad ka ïa, kam dei shuh ïa ngi ban ïatan tyllai, ban ïa kdew kti hynrei ka dei ka por ïa ngi ban mih lang shakhmat ban ïa kit lem ka lyngkor, ka lyngkha ka bun hynrei ki duna pat ki nongtrei,” ong u samla Lambokstar.
Shuh shuh u la ong ruh ba haba peit ïa ki mat bapher-bapher ïa kaba kum ka seng ka ju pynsngew sha ka Sorkar na ka por sha ka por haba kren shaphang ka pule ka puthi, ka ïoh kam ïoh jam, u pud u sam bad haba kren shaphang ki aiñ ki ban ïada ïa ka ri bad ka jaidbynriew hi baroh kawei, la katta phew tylli ki snem ba la ïoh ïa ka Jylla hynrei sngewsih ban ong ka dei jylla kaba khlem ka jingker, ka jylla kaba khlem ki aiñ ki kanun ka jylla kaba shu kdup bad pdiang laitlan katba wan na ki jylla bapher-bapher.
“Kine kiei-kiei ki dei ki dak mynsaw kaba ngi ïohi ba kum ka jaidbynriew khamtam ki samla ba ngin pyrkhat, ba ngin khie thiah bad puson ha la ka jong ka jong ka bynta kaba dei ban leh bad nga sngew ban ong ba ki 15 bad 20 snem ki ban wan ki long kiei-kiei ki ‘nem sniew ki ban lyngshop ïa ka ri bad ka jaidbynriew hynrei tang kawei katba ki samla ki dang don ïa kata ka thong, katba ki samla ki dang khih dang ksar, ki samla ki dang sngewthuh kumno ban shakri ïa ka ri bad ka jaidbynriew hi baroh kawei. Lada ngi kren ïa ka jingbun paid ngi sngew ba ngi dei tang shi symboh u khaw ha ka shi byrni ha kane ka mei India hynrei haba ngi kren pat ïa ka jinglong ka jinglah jong ki samla ka jaidbynriew nga sngew ban ong ba ka dei ka kamram ka jong ngi ba ngin ïakhun naduh ka mynsiem ban pyneh rngiew ban pyneh daw khamtam ban pynïeng rasong ïa ka ri bad ka jaidbynriew,” ong u samla Lambokstar.
U la ong ruh ba ha man ki mat, kaba ka seng ka kren sha ka Sorkar, kaei ka jubab kaba ju ïoh ka long ka dei tang ka jingrung along ka jingshah pharep bad shah thep patok jong ki dkhot ka KSU.
“Ko ki samla! ko ki paidbah ka bri u Hynñiewtrep kylli lem ïa kita ki ‘lei san snem kiba ki paidbah ki la jied ba ki paidbah ki la pynshong ha Secretariat, aïu ki la leh na ka bynta ki mat ki jura jong ka ri bad ka jaidbynriew hi baroh kawei,” ong u samla Lambokstar.
U la ong ruh ba ka KSU bad kiwei pat ki seng ki la pynsngew ïa la ki jong ki mat bapher bapher na ka bynta ka jingbha jong ka ri bad ka jaidbynriew. Hynrei ko ki paidbah ha kylleng ka bri u Hynñiewtrep kylli lem ïa kita kiba ong ki nongthaw aiñ, hato ka aiñ aïu kaba ki la thaw na ka bynta ban ïada ïa ka ri bad ka jaidbynriew ne kata ka aiñ kaba ki thaw ka long tang ban rben ïa ka pla shimet, kaba pynriew spah shimet ne hato ki thaw ka aiñ ban shong shngaiñ ka ri bad ka jaidbynriew hi baroh kawei.
