Shillong, Risaw 21
Ki nonghikai kiba don hapoh ka synjuk jong ka All Meghalaya SSA School Teachers Association (AMSSASTA) ki la pynbna ba ki la weng noh shwa ïa ka jingïakhih namar ba ka Sorkar ka la kular ban pynurlong ïa ka jingdawa tangba ym pat lah ban kular namar ba dang treikam ki kyndon pyrkhing ilekshon MLA shiteng samoi ha Gam-begre konstitwensi.
Kane ka jingweng noh ïa ka jingïakhih ka la wan hadien ba ki nongkitkam ka AMSSASTA ki la ïakynduh ïa ka Myntri Sorkar kaba dei ruh ka nongaiktien ka Sorkar MDA ka Kong Ampareen Lyngdoh ha ka jingdonlang ki ophisar ka tnat pule puthi kynthup ïa u Commissioner and Secretary ka tnat pule puthi u Vijay Mantri ha Secretariat ha ka Lah Sngi U Blei.
U President ka AMSSASTA, Bah Peter Thyrniang u la ong ba ha kane ka jingïakynduh, na ka liang ka Sorkar ka la kular ba yn sa pynkiew ïa ka tulop ki nonghikai namar ka jingpynkiew tulop ka dei naduh u snem 2016.
U la ong ba ki nonghikai kin weng noh shwa ïa ka jingïakhih bad yn ap ïa ka Sorkar ban pynurlong ïa ka jingkular haduh ban da weng noh ïa kut ka jingpyrkhing ilekshon ha kaba yn sa wan ïakynduh biang ïa ka Myntri Sorkar.
Kane ka jingïakhih ka la sdang naduh 1 tarik mynta u Risaw ha kaba ki nonghikai ki la ïalum ha Madan Malki khlem pud sngi.
