Shillong, Risaw 22
Ka Jaiñtia Students’ Union (JSU) Syndai Unit ha ka Sngi Ba-ar ka la leit ban buh da ka jingujor sha u Chief Executive Member (CEM) jong ka Jaiñtia Hills Autonomous District Council (JHADC) bad ruh sha u Additional Deputy Commissioner (ADC) halor ka jingtei beaiñ jong ki bar jylla ïa ka Mandir ne ka jaka mane blei ha shnong Lakroh ha West Jaiñtia Hills.
Ha ka kyrwoh khubor ba la pyllait, ïa kane ka jingujor sha u CEM ka JHADC bad sha u ADC la leit ban buh da ki Nongïalam ka JSU Syndai Unit hapoh ka jingïalam u President samla Pynshailang Suliang lem bad u General Secretary samla Mebanri Suliang ryngkat bad ki dkhot.
Ka JSU ka la pynkynmaw ba dang ha u bnai Lber, ka la leit ban jurip ïa katei ka jaka bad ha kaba ka la ujor ruh ha u Doloi ka Eleka Satpator bad pynpaw ba haduh mynta ym shym la ïohi satia ïa kano-kano ka dak ka shin ban leh eiei.
Ka Seng ka pynpaw ruh ïa ka jingbitar namar ba u CEM ka JHADC um shym la treh ban ïakynduh bad ki dkhot jong ka seng ban ïakren bad ïa phylliew halor ki mat kiba ktah ïa ka jaidbynriew. Kumta ka Seng ka ai khublei ïa u CEM ka JHADC namar ba u la pyni im-im peit-peit ba u dei u ingkhong shyllang mat.
Ka seng ka kyrpad ïa ki bor ba dei peit naduh ka district council, ki bor district ba kin shimkhia ïa kane ka kam khnang ban lait na kino-kino kynrum-kynram. Lada ka Sorkar bad ka district council kim shimkhia, ka seng ka la kren da kaba shai ba kan nym don ka jingbahkhlieh lada mih kino-kino kynrum-kynram hapoh ka thaiñ.
