Shillong, Risaw 22
Ka Bharatiya Janata Party (BJP), Meghalaya ha ka Sngi Ba-ar ka la pynbna ïa ka kyrteng jong u Bernard N. Marak kum u kyrtong ka seng ban ïa aireng ha ka ilekshon shiteng samoi ka ban long ha Gambegre ha ka 13 tarik u Naiwieng.
“Ngin ïakhun ïa ka ilekshon bad u kyrtong jong ngi un dei u Bernard N. Marak. Ki don 3 ngut kiba la pan tiket ban ïakhun na ka seng,” la ong u State President ka BJP, u Rikman G. Momin.
Haba kylli, u Momin u la ong ba wat la ka seng ka la ïaid shaid-shaid bad ki jingpynkhreh naduh ki ‘Booth Level’ – ha ka ilekshon ym lah ban tip lypa kaei ka ban jia hynrei na ka liang ka seng ka long kaba la khreh ban ïakhun ïa ka ilekshon.
“Ka jingjop jingrem baroh ka shong ha ki paidbah naba dei ma ki, ki ban jied ïa u kyrtong ba ki mon,” la ong u Momin.
Haba kdew ba ka Gambegre ka dei ka konstitwensi kaba dang duna ha kiba bun ki liang, utei u nongïalam u la ong lada ki paidbah ki ai lad ha kane ka kynti, ka seng kan sa pyni ïa ki paid nongshong shnong ka Ri-lum Garo kumjuh jong ka Jylla kumno ka BJP ka wanrah ïa ki kam pynroi.
Haba jubab, u Momin u la ong, “Ngi don ka jingkyrmen skhem hynrei kumba nga ong, kane baroh kan shong ha u paidbah la kin leit bad kiwei ne bad ka seng kaba wanrah ïa ka roi ka par.”
U Marak uba dei ruh u Vice-President ka BJP bad MDC ka GHADC u la ïakhun ïa ka ilekshon sha ka ïingdorbar thawaiñ ka Jylla ha u snem ba la dep na South Tura hynrei u la shah rem noh ha u Myntri Rangbah ka Jylla, u Conrad K. Sangma jong ka NPP.
Kum ban shu kdew hangne, ka ilekshon shiteng samoi ha Gambegre konstitwensi kan long ha ka 13 tarik Naiwieng katba ka jingñiew ‘vote’ kan long ha ka 23 tarik Naiwieng.
Kane ka konstitwensi ka la sah thylli hadien ba u MLA ka Congress, u Saleng A. Sangma u la hap ban ieh noh ïa ka jinglong nongmihkhmat hadien ba u la jop bad shah jied kum u MP ka Tura Parliamentary konstitwensi ha ka ilekshon Lok Sabha mynta u snem.
Ka National People’s Party (NPP) ka la dep pynbna ïa ka kyrteng jong ka Dr. Mehtab Chandee Sangma, kurim jong u Myntri Rangbah ka Jylla, u Conrad K. Sangma kum ka kyrtong katba ka liang pyrshah – All India Trinamool Congress (AITC) ka la pynbna ïa ka kyrteng jong ka Sadhiarani Sangma kum ka kyrtong. Ka Sangma ka dei ruh ka dkhot jong ka Garo Hills Autonomous District Council (GHADC).
Ha kawei ka liang, ka Congress ka la pynbna ïa ka kyrteng jong u Jingjang M. Marak kum u kyrtong ka seng ban ïa aireng ha kane ka ilekshon shiteng samoi.
U Saleng u la mihkhmat ïa ka Gambegre konstitwensi naduh u snem 2013 wat la u la shah jied nyngkong eh kum u MLA ha u snem 2008 (na ka Congress) na Dalamgiri konstitwensi (hashuwa).
U la kynriah noh sha Gambegre konstitwensi ha u snem 2013 hadien ka jingpynbeit thymmai ïa ki konstitwensi hapoh ka Jylla bad hadien kane, u la shah jied lynter haduh ka ilekshon sha ka ïingdorbar thawaiñ ka Jylla ha u snem 2023 khlem da mad ïa ka jingshah rem.
