Shillong, Risaw 22
Ka jingshah kyndang jong ki ïing ki sem bad ka jingshah tuh jong ki ar shaka ka la ïai bteng na kawei ka sngi sha kawei pat, haduh ba ka la wanrah ïa ka jingbym long shngaiñ shuh ha ki nongshong shnong.
Katkum ka khubor kaba la ïoh na ki pulit la ong ba u Sengrit Sangma u la ujor ba ha ka miet jong ka 18 bad 19 tarik mynta u bnai, ki runar bym lah ban ithuh ki la tuh ïa ka ar shaka ka jong u, kaba don ïa u registration number ML05-H-9946 na ka jaka sah ka jong u, kaba don ha ka shnong Chiragata kaba hap hapoh ka Dangar Out Post ha East Khasi Hills.
Ha kawei pat ka khubor, la ong ba kawei ka nongshong shnong jong ka thaiñ Madan Laban, Shillong ka la ujor sha ki pulit ba ha ka 19 tarik mynta u bnai ha ka por kumba 7.30 dang step, ki runar bym lah ban ithuh ki la ïoh ban rung shapoh ka ïing sah jong ka, bad ban tuh ïa kawei ka Laptop bad ka ATM card ka jong ka.
Ha kawei pat ka jingjia, u Bah Banhernam Khyriem u la ujor ba ha ka 19 tarik mynta u bnai ha ka por kumba 11.40 mynstep, ki runar bym lah ban ithuh, ki la tuh ïa ka ar shaka ka jong u, kaba don ïa u registration number ML05-R-0939 na ka thaiñ Langkyrding, Block-II, Shillong.
Kumjuh ruh na ka liang jong u Santosh Ch Sangma u la ai ka jingujor ba ha ka 19 tarik mynta u bnai, ki runar bym lah ban ithuh ki la tuh ïa ka ar shaka kaba dang thymmai na ka thaiñ Fire Brigade, Shillong.
U Sanshwa Dalangki Dhar ruh u la ai ka jingujor ba ha ka miet jong ka 19 bad 20 tarik mynta u bnai, ki runar bym lah ban ithuh ki la tuh ïa ka ar shaka ka jong u, na ka thaiñ Madanrting Block-C, Shillong.
Na ka liang jong u Ratan Paul, uba dei u Manager jong ka Baba Guest House kaba don ha Khyndailad (Police Bazar), Shillong u la ai ka jingujor ba ha ka miet jong ka 19 bad 20 tarik mynta u bnai, ki runar bym lah ban ithuh ki la tuh ïa u ‘water motor’ na phyllaw jong ka ïingbasa.
Ha kawei pat ka khubor ki pulit, la ong ba ha ka 20 tarik mynta u bnai, dang ha ka por kumba 3.24 eiei mynstep, ki VDP jong ka Nongmensong, Shillong ki la ïoh ban kem noh markhmat ïa uwei u Kiran Biswa (20 snem), katba u dang pyrshang ban prong jubor shapoh kawei ka dukan kaba don ha ka thaiñ Demseiñïong, Shillong. Ïa une u Kiran hadien ba la ïoh kem, la leit ban aiti noh sha ki pulit ban leh ïa kaba donkam.
Na ka liang jong u Wansai A Marak u la ujor ba ha ka miet jong ka 18 tarik mynta u bnai, ki runar bym lah ban ithuh ki la tuh ïa ka ar shaka ka jong u, kaba don ïa u registration number ML05-AA-5787 na ka jaka sah ka jong u, kaba don ha shnong Nongbah Bynther ha Eastern West Khasi Hills.
Ha kawei pat ka khubor, u Nikran G Momin u la ujor ba ha ka miet jong ka 18 tarik mynta u bnai, ki runar bym lah ban ithuh, ki la prong tuh jubor shapoh dukan die tiar kali ka jong u, kaba don ha Rongjeng Songma ha East Garo Hills bad ban tuh ruh ïa ka arshaka ka jong u, kaba don ïa u registration number AS01-AR-1952 bad ka pisa kaba long T.15 hajar.
Na ka liang jong u Pericklesh R Marak ruh u la ujor ba ha ka 19 tarik mynta u bnai, dang ha ka por 2.30 dangstep, ki runar bym lah ban ithuh ki la tuh ïa ka ar shaka ka jong u kaba don ïa u registration number ML08-H-6923 na ka phyllaw jong ka jaka sah ka jong u ha Mendal kaba hap hapoh ka thanat Bajengdoba ha North Garo Hills.
