Shillong, Risaw 22
U Sengkrabirth Marak, 26 snem rta ha ka Sngi Ba-ar u la leit ban thep kyrteng na ka bynta ban ïakhun ha ka ilekshon MLA shiteng samoi kum u kyrtong shimet (Independent) ka ban long ha ka 13 tarik Naiwieng, 2024 ha Gambegre Konstitwensi.
U Sengkrabirth u la long u kyrtong uba nyngkong eh ban poi leit thep kyrteng na ka bynta ka ilekshon MLA shiteng samoi ha Gambegre Konstitwensi. Ïa une u kyrtong shimet ha kane ka sngi, la synran lang da katto-katne ki nongkyrshan jong u hakhmat u Returning Officer ba dei peit ïa kane ka ilekshon.
U Sengkrabirth u ban ïakhun kum u kyrtong shimet ha kane ka ilekshon, u dei uba la pyndep ïa ka jingpule ha ka kyrdan MA ha ka ktien Garo na ka skulbah ICFAI.
Kum ban shu kdew, ka jingthep kyrteng na ka bynta ka ilekshon shiteng samoi ha Gambegre ka la sdang naduh ka 18 tarik mynta u bnai bad kan kut ha ka 25 tarik mynta u bnai. Ka jingthep vote kan long ha ka 13 tarik u Naiwieng 2024 bad ka sngi ban ñiew vote kan long ha ka 23 tarik Naiwieng.
Lah ban kdew ba ki seng saiñpythei kiba la sei kyrtong ha kane ka ilekshon shiteng samoi haduh mynta ki long na ka seng NPP kaba la sei da ka kurim jong u Myntri Rangbah ka Jylla ka Mehtab Chandee Sangma, ka TMC ka la sei da ka kurim jong u Myntri barim ka jylla ka Sadhiarani M Sangma, kaba dei ruh ka MDC jong ka GHADC, ka Congress ka la sei da u Jingjang Marak bad ka BJP ka la sei da u Bernard R Marak uba dei u MDC ka BJP sha GHADC.
