Nongstoiñ, Risaw 22
Ha ka Sngi Ba-ar jong ka taïew, u phria uba jur u la ther tyngeh ha ki bynta jong ka shnong Pathew bad ka thaiñ Parïong kiba hap hapoh ka Eastern West Khasi Hills District ha kaba ki jingthung-jingtep bad ki mar rep mar riang ki la julor lut khait.
Katkum ka tyllong khubor kaba la ïoh lum la ïathuh ba katei ka jingjia hap phria ka la jia ha ka 22 tarik mynta u bnai ha ka por kumba 1 baje eiei shiteng sngi.
Katkum ka khubor kaba la ïoh na u Bah Alington Marngar uba dei u Sordar jong ka shnong Pathew, u la ïathuh ba na kane ka jingwan hap jong u phria, ki jingthung ba kynthup naduh u kba, u phan, bad ki jhur ki jhep ki la julor lut na ka jingwan lynshop jong ka bor mariang bad katto-katne tylli ki ïing sop tin ruh ki la shah pynjulor ha u phria ha kaba ki tin ki la pei thliew lut.
Shuh shuh la ong ruh ba halor katei ka jingjia, na ka liang u Sordar u la dep ban pyntip ruh sha ka ophis jong u Block Development Officer (BDO) ka Mawthadraishan C&RD Block bad kumjuh ruh sha ka tnat ka rep ka riang ba kin wan jurip bad shim jingkheiñ halor ki jingjulor bad ki jingduhnong kiba la wan jia na ka jingther jong u phria.
