Shillong, Risaw 22
Ka shnong Khliehrangnah na West Jaiñtia Hills, ka la ïoh ïa ka kyrdan balai ha ka Best Village Panchayat jong ka 5th National Water Awards, 2023 ha kaba ïadei bad ka Water Resources Conservation & Management.
Ïa katei ka khusnam la aiti da u Myntri ka tnad Jal Shakti, u C.R. Patil, ha ka jingïalang kaba la long ha Vigyan Bhawan, New Delhi kaba la pynlong da ka Ministry of Jal Shakti, Department of Water Resources, River Development, ba la plie da ka President ka Ri India, ka Droupadi Murmu.
Ïa ki khusnam la sam sha ki 38 ngut ki nongjop ha ki 9 tylli ki kyrdan kiba kynthup ïa ka khusnam Best State, Best District, Best Village Panchayat, Best Urban Local Body, Best Water User Association bad Best Civil Society.
U Myntri Rangbah ka Jylla, u Conrad K Sangma u la pynpaw ka jingsngew sarong ban ai khublei ïa ka shnong Khliehrangnah, kaba la wan balai ha ka jingïoh khusnam ha ka National Water Awards 2023, ha ka Best Village Panchayat.
Ïa kane ka khusnam la ïoh namar ka jingtrei shitom jong ka shnong ka thaw kiba ïaleh ban pynneh pynsah ïa ka um ka wah bad ka jingskhem jingmut ka sorkar ban pynthikna ba ki jingdon jingem la pyndonkam ha ka rukom kaba dei bad kaba don ïa ka jingkitkhlieh.
Ïa katei ka khusnam la leit ban pdiang da u Bah Lamluti Langstang, Rangbah Shnong ka Khliehrangnah, West Jaiñtia Hills bad u Gunanka DB, IFS, Executive Director, MBMA.
Ha ka shnong Khliehrangnah la leh ïa ka project hapoh jong ka Community-Led Landscape Management Project (CLLMP), kaba la bei tyngka da ka World Bank bad pyntreikam da ka Meghalaya Basin Management Agency (MBMA).
Kane ka jingïoh khusnam ka pyni ïa ka jingjop ha ka jingpyntreikam ïa ka CLLMP project ban kyntiew ïa ki shnong ki thaw kiba shim ïa ki sienjam, ban ïaleh ban pynneh pynsah ïa ki um ki wah bad ïa ki kam pynroi ki ban pynneh pynsah ha ka jylla.
Ka National Water Award ka dei kaba pynleit jingmut halor ki kam kiba bha bad ka jingtreishitom kaba la leh da ki riewshimet bad ki kynhun ha kylleng ka ri, na ka bynta ban pynurlong ïa ka thong jong ka Jal Samridh Bharat.
