Mawkyrwat, Risaw 23
Hadien ka jingud-jingnam jong ki paidbah nongshong shnong ka Myriaw kaba hap hapoh ka Ranikor C&RD Block namar ka jingduh noh ïa u khaw rashon ha ki lai bnai, kita u Jylliew, Nailar bad Nailur 2024, ka la wanrah jingduhnong kaba khraw ïa u duk u suk kiba dei hok ban ïoh ïa une u khaw kumba ïoh lem kiwei ki shnong.
Ha kaba ïadei bad kane, ka Federation of Khasi Jaiñtia & Garo People (FKJGP) South West Khasi Hills District ha ka 23 tarik u Risaw 2024 hapoh ka jingïalam u Secretary Bah Balse Kharbani ryngkat ki dkhot, ki la leit ban ïakynduh bad ai ruh da ka kot jingthoh ïa u Additional Deputy Commissioner jong ka South West Khasi Hills District u Bah L.T Tariang.
Ha kane ka jingïakynduh lyngba ka tnat Supply, ka seng ka lap ba ïa une u khaw rashon baroh lai tylli ki bnai na ka liang ka ophis ka la dep ban pyllait, hynrei kaba lyngngoh ka long ba ha kitei ki centre ba dei ban sam ym shym la poi satia. Ha kaba ïadei bad ka jingjah jong u khaw, na ka liang u Bah L.T Tariang u la kular bad un sa phah ban tohkit na ka bynta ban lap ïa ka jingshisha halor ka jingjah une u khaw.
Namar kata, ka seng ka kyntu ïa ki dealer kumjuh ruh ïa ki wholeseller jong ka South West Khasi Hills District wat la kam pat tip haduh mynta mano ba pynjah ïa une u khaw hynrei ka kyntu ba nangne shakhmat kim dei ban lehkai ïa ka kam jong u paidbah lym kumta na ka liang ka seng kam banse ban ïaid da ki kam ba tyngeh.
