Shillong, Risaw 23
Ka Sorkar Jylla ha ka Sngi Balang ka la rai ban pynjynsur ïa ka rta ïoh kam jong ki nonghikai SSA ka Jylla ba kin lah ban ïakhun ïa ki eksam thung kam nonghikai ha ki skul Sorkar.
Ïa kane ka rai la shim ha ka jingïalang jong ka Kynhun Myntri kaba long ha Resubelpara, North Garo Hills District.
U Myntri ka Tnad Pule Puthi, u Rakkam A Sangma u la ong ba ka Sorkar ka la plie lad ïa ki Nonghikai SSA ba kin ïakhun ïa ki eksam kam nonghikai ha ki skul Sorkar da kaba pynjlan ïa ka rta ïoh kam jong ki.
“Ki don shibun ki nonghikai SSA kiba la biang na ka bynta ban hikai, kiba la pyndep ïa ka MTET, hynrei ka rta jong ki pat ka la palat, kumta ban ai lad ïa ki ba kin thep ïa ki kam hikai ha ki skul LP, UP bad HS jong ka Sorkar ngi la rai ban pynjlan ïa ka rta thep kam hikai”, la ong u Rakkam.
U Myntri u la pyntip ba ka Kynhun Myntri ka la pynkiew ïa ka rta thep kam ïa ki nonghikai SSA sha ka 45 snem, kaba mut ba ki nonghikai SSA kin lah ban ïakhun ïa ki eksam thung kam ba la pynbna da ka Sorkar ha ki skul Lower Primary, Upper Primary, Secondary bad Higher Secondary.
Kane ka rai jong ka Sorkar ban ailad ïa ki nonghikai SSA da kaba pynjlan ïa ka rta thep kam, ka long ruh hadien ba ki nonghikai SSA ki la pynlong ïa ka jingïakhih ban dawa pynkiew ïa ka tulop, bad hadien ba kawei pat ka kynhun ki nonghikai SSA ka la dawa na ka Sorkar ban ai jingshngaiñ ïa ka kam ki nonghikai SSA da kaba ithuh noh hapoh ka tnat Pule Puthi ka Jylla.
