Shillong, Risaw 23
U Myntri Sorkar Pdeng ba dei khmih ïa ka tnat Textiles, u Giriraj Singh, un wan jngoh ar sngi lynter ïa ka Jylla Meghalaya ha ka 25 bad 26 tarik mynta u bnai. Ha kane ka jingwan jngoh un plie paidbah ïa ka shlem treikam jong ka National Institute of Fashion Technology (NIFT) ha Umsawli bad ïashimbynta ha ka jingïalang pynkup burom ïa ki samla pule ka NIFT. Ha ka 25 tarik, u Myntri un plie paidbah ïa ka NIFT ha Umsawli ha ka jingdon ryngkat lang u Myntri Rangbah ka jylla Meghalaya, u Conrad K Sangma, u Myntri Khynnah ka Sorkar Pdeng uba peit ïa ka tnat bar ri bad tnat Textiles, u Pabitra Margherita bad kiwei kiwei.
Ynda la dep ïashimbynta ha ka jingpynkup burom ïa ki samla pule, une u Myntri ha kane kajuh ka sngi, un hiar sha Ri Bhoi district ban peit ïa ka Aspirational District Programme bad ka jingpyntreikam ïa ki skhim Sorkar Pdeng ha kaba un ïakren ruh bad ki bor pynïaid district shaphang ki sienjam ban wanrah ïa ka roi ka kiew.
Ha ka sngi kaba bud, kata ha ka 26 tarik, u Giriraj Singh un leit sha ka shnong Eri Silk ha Umden ban ïakren bad ki nongthaiñ jaiñ, ki nongshna tiar bad kiwei pat kiba donbynta ha ka kam jngohkai.
Shuh shuh, un ïakren bad ki briew kiba ïoh jingmyntoi ha ki jaka bapher-bapher kiba kynthup ïa ka Umkon-1 Anganwadi Centre bad Marngar Primary Health Centre.
Kane ka jingwan jngoh u Myntri ka pyni ïa ka jingbuh hakhmat eh u Myntri Rangbahduh ka ri, u Narendra Modi bad ka Sorkar Pdeng kaba phaikhmat bha ha ka liang ki jingtei jingshna, ka jingpynïasoh, ka koit ka khiah bad ki lad jingsumar, ka pule puthi, ki lad sengkam sengjam (startup, entrepreneurship) bad ka jingkyntiew ïa ka kam jngohkai kaba ïaid ryngkat bad ka jingïohi jngai katkum ka ‘Viksit Bharat’ bad ‘Viksit Purvottar’.
