Nongpoh, Risaw 23
U Syiem jong ka Hima Mylliem ryngkat bad ka Dorbar Syiem, ki la khot da ka jingïalang ïa ki san tylli ki shnong, ka Umbuda, Ïewmawlong, Mawphrew, Umjarasi bad Mawtnum ban ïakren halor ka mat jingdawa jong ki ban ïoh noh ïa la ka jong ka Raid Khasi ban phiah na ka Raid Marngar kaba ki la don mynta baroh shi katta.
Ïa kane ka shithi khot ïa ki Nongïalam Shnong jong kitei san tylli ki shnong, kaba la soi da u Symbud Syiem ka Hima Mylliem lane uta u Deputy Syiem, la khot ïa kitei ki Nongïalam ba ki dei ban leit mih sha ka shlem treikam jong u Syiem bad ka Dorbar ka Hima Mylliem kaba don ha Mawkhar ha ka 30 tarik mynta u Risaw ban ïakren ïatai halor katei ka mat jingdawa ka jong ki.
Kum ban shu kdew, kitei san tylli ki shnong kiba dei ki shnong kiba la buhai shnong bun paid da ki Khasi Khara bad ki jaidbynriew Bhoi, ki la dep ban dawa ïa la ka jong ka Raid na ka Hima Mylliem da ki phew snem mynta ha kaba na ka liang ki Nongïalam kitei ki san tylli ki shnong kiba la lam khmat da u Bah CB Syiem, CEM barim ka KHADC uba dei ruh u Rangbah Shnong jong ka Umbuda u la pyntip ba na ka liang u Syiem ka Hima Mylliem u la thok la shukor ïa ki.
U Bah CB Syiem u la pyntip ruh ba na ka liang kine ki san tylli ki shnong ki la mih shakhmat ban dawa ïa la ka jong ka Raid naduh ki snem 2003-04. U ïathuh ruh ba na ka liang ka Hima Mylliem lyngba u Pa’iem Latho Manik Syiem (bam kwai ha dwar U Blei), u la kular ban ai ïa katei ka jingdawa ka jong ki ha u snem 2010, hynrei hadien pat u la kyntait pat ban ai ïa katei ka jingdawa ka jong ki da kaba ong ba ym lah satia ban ai Raid naba kim don ïa ka lehniam lehrukom bad ka kñia ka khriam kumba long kiwei kiwei ki Raid.
Hadien ka jingshah thok ha utei u Syiem, ki san tylli ki shnong ki la shim da kawei ka rai ban mih noh na ka jingkhmih jong ka Hima Mylliem bad leit ban kyrpad sha ka Khasi Hills Autonomous District Council (KHADC) ba kan shimkhia halor kane ka kam ban pynurlong ïa katei ka jingdawa ka jong ki ban ïoh noh ym tang shuh ïa ka Raid hynrei ban ïoh pat da ka Elaka kaba thymmai jong kine ki shnong Khasi.
Shuh shuh, u Bah CB Syiem uba dei ruh u Chairman jong kitei ki san tylli ki shnong, u la ong kumno ka lah ban long ba ki raiot kin synshar pyrshah ïa ki khun ki hajar da kaba kdew ba u Pa’iem Latho Manik Syiem u la kam ba ki jaidbynriew kiba synshar ha ka Raid Marngar kim dei satia ki khun ki hajar, hynrei ki dei tang ki raiot.
Ha kaba ïadei pat bad ka jingkhot jong u Syiem ka Hima Mylliem ryngkat ka Dorbar sha katei ka jingïalang ka ban long ha ka 30 tarik mynta u bnai, u Bah CB Syiem u la ong ba ïa mynta um pat lah ban ong eiei namar u hap ban shim lang ïa ka rai jong ki Nongïalam jong kitei kiwei ki shnong da kaba pynpaw ba ha ka jingshisha katkum ka aiñ hi, ka Hima Mylliem kam don bor eiei shuh halor jongki, naba ki la dep ban mih bad kaba la leh ïa katei ka kam ka dei tang ka KHADC.
Haba ïoh ban ïakren pat bad u Syiem jong ka Raid Marngar, u Pa’iem Richard Syiem u la ong ba na ka liang ka Raid Marngar kan pyrshah beit haduh kaba kut ïa katei ka jingthmu ban phiah ïa ka Raid Marngar da kaba pynshai ba ka Raid Marngar ka dei tang ka kyrteng jong ka Raid, hynrei ka dei ka Raid kaba la don naduh kulong kumah hyndai hynthai bad kaba ithuh naduh ka por jong ka Hima Shyllong.
U Pa’iem Richard Syiem u la ïathuh ruh ba ka kyrteng ‘Marngar’ kam dei satia ka jaidbynriew, hynrei ka dei tang ka kyrteng jong ka Raid kaba don la ki jong ki kur ki jaid, ki lehniam lehrukom, ki kpep ki mawshyieng bad Dorbar kur bad ka long kaba bakla ban ong ba ka Raid Marngar ka dei ruh ka ‘Jaidbynriew Marngar’.
