Shillong, Risaw 23
Ka long ka khubor lehse kaba sngewtynnad na ka bynta ki MLA kiba ju kloi ban ïarap ïa ki paidbah lyngba ka bhah kaba la mang kyrpang ïa baroh 60 ngut ki MLA kaba la tip kum ka Discretionary Grant (DG) namar ba ka Sorkar Jylla ka pynbna ban pynkiew noh ïa ka jingmang pisa na ka T.10 lak sha ka T.20 lak man u snem khnang ba ki MLA kin ïoh ban pyndonkam ïa kane ka pisa.
Kane ka jingpynkiew ïa ka DG sha ka T.20 lak ka la wan hadien ba u MLA ka BJP u Bah Sanbor Shullai u la buh ka jingkyrpad ïa u Lamphang ka Ïingdorbar Thawaiñ bad u Myntri Rangbah ka Jylla ban pynkiew ïa ka mang tyngka bad ïai buddien ïa kane.
Da ka jingpynkiew ïa ka DG, ki lai tylli ki skhim kiba ju wan lang kum ka MLA skhim kin ym don shuh, kita ki long, ka Intensive Arts & Culture Development Programme (IACDP) kaba T. 2.50 lak man u snem, ka Development of Traditional Folk Music (DTFM) kaba T.2.50 lak man u snem kaba hap hapoh ka tnat Arts & Culture bad ka Sports & Youth Development Programme (ISYDP) kaba ju mang T. 3 lak man u snem lyngba ka tnat Sports Youth Affairs.
Kum ban pynkynmaw, u Bah Sanbor u dei u MLA uba ju ïarap bha ïa ki paidbah bad uba ju ïathuh paidbah ruh shaphang ka jingmang pisa lyngba ka Discretionary Grant na ka bynta ban ïarap ïa ki paidbah ha konstitwensi katkum ka jinglah u MLA.
Na ka liang u Bah Sanbor u la ju ïarap ruh ïa kiba na kiwei ki konstitwensi khamtam kiba pawkhmat bad wanrah burom ïa ka Jylla.
Ka jingpynsngew u Bah Sanbor kam shym la lehnohei lyngba ka jingmang ka Sorkar ban pynkiew ïa ka DG sha ka T.20 lak.
