Khliehriat, Risaw 23
Hadien ba ka Star Cement kam lah ban pynurlong ïa ki jingkular, ki nongñiah trok jong kane kompeni ha ka jingsynran ki Nongïalam jong ka VPP Jaiñtia Hills ha ka 22 tarik Risaw ki la hiar sha karkhana ban dawa biang ïa ki mat jingdawa.
Ha kane ka jinghiar ki bor pynïaid jong ka karkhana ki la pyneh bad ki la buh por ban ïakynduh ïa ki. Hynrei na ka liang ki nongñiah trok bad Nongïalam ka VPP ki la leit ban tur paidbah sha ophis treikam kane ka karkhana.
Hynrei ha shiteng lynti ki bor pynïaid karkhana ki la wan ban khot ïakren noh.
Hadien ba la wai ka jingïakren ka kompeni ka la kular ïa ka rai ban pynkiew ïa ki mat jingdawa kaba long 80 persen kata ka bai lynti 3500 ha ka shi lynti bad ka tulop pat 1300 na ka shi lynti.
Lah ban pynkynmaw ba ki nongñiah trok jong kane ka karkhana ha u bnai ba la dep ki la pynlong ka jingïakhih da kaba sangeh trei ban dawa pynneh ïa ka tulop 30 hajar tyngka shibnai namar ka jingkiew jong ki mar bam mar dih bad ban pynkiew ïa ka bai lynti bad kiwei de ki jinglut jingsep na ka bynta ki nongñiah trok 12 shaka bad 16 shaka.
