Shillong, Risaw 23
Ka jingshah kyndang jong ki ïing ki sem bad ka jingshah tuh jong ki ar shaka kam dei shuh ka khubor kaba dang thymmai hynrei kaba ïai bteng na kawei ka sngi sha kawei pat. Kane ka la pynlong ruh ban wanrah ïa ka jingbym long shngaiñ shuh hapdeng ki nongshong shnong.
Katkum ka khubor kaba la ïoh na ki pulit la ong ba u M Jamatia u la ujor ba ha ka por mynsngi jong ka 20 tarik mynta u bnai, ki runar bym lah ban ithuh ki la prong tuh shapoh ka ïing jong u bad ban tuh ïa ki mar ba la kot palat lak tyngka.
Ha kane ka jingujor, u M Jamatia u la ong ba kine ki runar hadien ba ki la prong tuh shapoh ka ïing jong u, kaba don ha Upper New Colony, Laitumkhrah, Shillong ki la ïoh ban tuh ïa kawei ka laptop, kawei ka tyndong LPG, ki jaiñ ki nep bad ki kot ki sla kiba donkam, kiba la shongdor kumba T.1.13 lak.
Halor kane ka jingshah tuh, na ka liang jong ki pulit ki dang pynlong ïa ka jingtohkit ban lap ïa ki jingshisha bad ïa ki runar kiba donkti ha kane ka kam.
Ha kawei pat ka khubor na ki pulit, la ong ba u David Sangma u la ujor ba hapdeng ka miet jong ka 19 bad 20 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-U-8040 na ka jaka sah ka jong u ha Pynthorbah Block-II, Shillong.
