Shillong, Risaw 24
Ka Sorkar Bangladesh haduh mynta kam pat shah ban plie ïa ki ‘Border Haat’ kiba don markhap bad ka jylla Meghalaya namar kam pat sngewshngaiñ naduh ba ïakhih ki samla pule ban pynhiar shuki ïa ka Myntri Rangbahduh ka ri Bangladesh ka Sheik Hasina.
Kum ban shu pynkynmaw ka jingkhang ïa ki ‘border haat’ hapdeng ka Meghalaya bad Bangladesh ka la long naduh ba la jur bha ka jingïakhih ki samla pule ha u bnai Nailar 2024 ban dawa pynkylla ïa ka bhah thungkam bad hadien pat la pynjur ka jingïakhih ban pynhiar shuki ïa ka Myntri Rangbahduh ka ri kat haduh ba ka Sheik Hasina ka hap ban phet na la ka jong ka ri ha ka 5 tarik Nailar 2024.
Ban tip kham bniah, u nongthoh khubor u la ïoh ban ïakynduh ïa u Syiem ka Hima Bhowal u Pa’iem Kynsai N Syiem uba dei u dkhot ka Haat Management Committee jong ka Balat Border Haat kaba hap ïaid na Dangar, East Khasi Hills uba la ïathuh ba naduh ba la khang ïa kane ka haat bad ka ri Bangladesh, ka la ktah ïa ka kamai-kajih ki khun ki hajar.
U la ïathuh ba naduh ba la mih ka huri-hura ha Bangladesh, ka Sorkar Meghalaya ka la khang shwa shipor ïa ka Balat Border Haat bad kiwei de ki haat khnang ban ïada na ka jingwan kiew ki nong Bangladesh sha India.
U la pyntip hadien ba ka ri Bangladesh ka la sdang jai-jai, ka Sorkar Meghalaya ka la kwah ban plie biang ïa kine ki haat hynrei u Deputy Commissioner ka Sunamganj District um shym la nud ban plie namar u kwah ba ka Sorkar India kan ai jingthoh sha ka Sorkar Bangladesh.
U Pa’iem Kynsai u la ïathuh ba katkum ka jingïoh jingtip ba ka jingbymnud u DC Sunamganj, ka dei namar um pat sngewshngaiñ ha Bangladesh khamtam ban ïadie-ïathied bad ka ri India lyngba ki border haat.
“Nga don jingkyrmen ba ka Sorkar India bad Bangladesh kin ïoh ban plie noh khnang ba ki paidbah baroh ar tylli ki ri kin ïoh ban ïadie-ïathied biang,” u la ong.
U la ïathuh na India ki khlaiñ ban pynmih ki mar rep, katba na Bangladesh ki khlaiñ ban pynmih ki melamine bad kiwei de.
