Shillong, Risaw 24
Ki nongshong shnong Khasi kiba dei ki trai ri-trai muluk jong ka shnong Lumdiengjri ki la pynpaw ïa ka jingsngewkhia halor ka jingbym shimkhia jong ka tnat Meghalaya Urban Development Authority (MUDA) ban khmih halor ka jingleh katba mon bad ka jingshna be-aiñ jong ki bar jylla ïa ki jingtei hapoh u pud-u sam jong ka shnong kiba khlem bud satia ïa ki aiñ shna ïing ne ka Meghalaya Building-Bye Laws.
Ïa kane la lap ha kaba kawei ka ïing kaba la long trai da u MD Sulaiman kaba don hapoh ka shnong, ka la tei ïa ka ïingmala khlem da ïoh jingbit satia na ka tnat MUDA ne wat na ki bor shnong ruh kumjuh.
Haba kylli ïa utei u briew la u la ïoh jingbit ne em na ka shnong ban tei ïa kane ka ïing jong u, na ka liang utei u bar jylla u la ong ba u la shu pynthymmai ïa ka ïing barim jong u hynrei katkum ki kyndon jong ka shnong ka long ba uno-uno u trai ïing u dei ban da pyntip shwa sha ka shnong ha shwa ba un pynthymmai ne tei thymmai ïa ka ïing jong u.
Ki nongshong shnong ki la ïathuh ba na ka liang u MD Sulaiman u la ong ba u la shu pynbha ïa ka ïing jong u kaba dei ka ‘Assam type’ hynrei katkum ka jingkhmih la sakhi ba ka dei ka jingtei ïa ka ïingmala bathymmai kaba heh.
Na ka liang ka shnong ruh halor kane ka bynta, ka la dep ban phah da ka jingthoh sha ka MUDA naduh u snem 2023 hynrei wat hapdeng kane ka jingpyrshah, la ïohi ba une u bar jylla u la leh pyrshah bad tei beit ïa katei ka jingtei.
Shuh-shuh na ka liang ki nongshong shnong ki la ong ba kim tip satia ïa kaei kaba don sha lyndet jong kane ka kam namar kumba ka long, la ïohi ba u Inspector ka MUDA, u ju wan peit ïa katei ka jingtei tad haduh u bnai Lber 2024 ruh.
Ki nongshong shnong kiba don ïa ka jingkitkhlieh halor kane ka bynta, ki la kylli pyrthew ïa utei u Inspector bad na ka liang une u Inspector, u la ong ba utei u bar jylla um donkam shuh ïa ka jingbit na ka MUDA ban tei ïa katei ka jingtei jong u namar ba u la ïoh lypa ïa ka bording ilektrik bad ka um, kumta kam donkam shuh ïa u ban pan jingbit.
“Hato kane ka Building Bye Laws, ka khmih tang ïa ka bording bad ka um ne kumno? Ngi kwah ban ïoh jingshai na ka ophis MUDA halor kane. Ne hato ka Building Bye Laws ka treikam tang ïa ki Khasi kiba shna ïing ha u pud-u sam ka Urban Areas?”, la buh jingkylli ki nongshong-shnong.
Ki nongshong shnong ki la ong ruh ba haba u Khasi uba dei u trai ri-trai muluk u shna ïing, u hap ban rejistar sha ka shnong bad kumjuh ruh sha u Syiem, ka District Council ne wat sha ka ophis jong ka DC ha ryngkat ka jingpyni ïa ki jingtei kiba thmu ban tei, bad hadien kata na ka liang ka ophis jong ka MUDA pat kan sa ai jingbit bad hap ruh ban siew da ki phew hajar sha katei ka ophis.
Kitei ki nongshong shnong ki la ong ruh ba haba la sdang ban tei ïa kano-kano ka jingtei ruh, na ka liang ka MUDA ka ju wan ban khmih dalade ïa ka jingtei bad lada ka jingtei ka long ka bym i long ban tei, ka MUDA kam ai jingbit satia ban tei ha kaba ka ju pynlong ruh ban duh noh ha ka ban aplai ïa ka bording bad ka um. Na ka liang ki nongshong shnong ki la ong ba kumba ka long pat, la ïohi ba ka Building Bye Laws ka treikam tang ïa ki Khasi ba shong ba sah ha u pud-u sam ka Urban.
Namar kata, na ka liang ki nongshong shnong ki la dawa na ka MUDA ba kan pynshai paidbah halor kane ka bynta khamtam ha kaba ïadei bad ki aiñ shna ïing ne ka Building Bye Laws namar ki Khasi ki ju bud pyrkhing ïa kine ki kyndon aiñ shna ïing, katba u bar jylla pat u la leh katba u mon bad kaba pyni shai kdar ruh ba kane ka aiñ ka treikam thik tang ïa ki trai jylla ym ïa u bar jylla.
