Shillong, Risaw 24
Ka Khasi Hills Autonomous District Council (KHADC) ka la lah ban pynrung ïa ki kyndon aiñ kiba ïasyriem kum ka Inner Line Permit (ILP) ka ban treikam ha ki shnong lyngba ki dorbar shnong. Ïa kane ka aiñ kaba la tip da ka KHAD (Administration of Elaka) Second Amendment Act, 2023, la dep ban ai muhor da u Lat ka Jylla, u C.H. Vijayashankar.
“Kane ka aiñ kaba ngi ïoh ka bun bha ki jingmyntoi, Nga lah ban ong ba kane ka aiñ ka dei ka ILP ha ki shnong”, la ong u Chief Executive Member (CEM), u Bah Pynïaid Sing Syiem.
U CEM u la ong, lyngba kane ka aiñ yn lah ban tehlakam ruh ïa ka jingïoh shong shnong ki briew kiba nabar, da kaba lum ïa ki jingtip ba pura lyngba ki kot ki sla na ki jaka ba ki wan.
U la ong ba ha kane ka aiñ la lah ban pynrung ïa ki seng samla bad seng kynthei/longkmie ban ithuh noh da ka aiñ hapoh ka jingtreikam ki dorbar shnong.
“Baroh shikatta ka shu dei ka rukom ban don ki seng samla, ki seng kynthei hynrei mynta lada ki mih shisha ki seng samla ki seng longkmie ban ïarap ïa ki dorbar shnong kan long kum u budlum ban tehlakam ïa ki kam sniew kum u drok ha ki shnong”, u la ong.
U Deputy CEM ba khmih ïa ka tnat Elaka, u Bah Pynshngaiñ N Syiem u la ong hadien ba la peit bniah bha da ka executive committee, la sngew donkam ban pynrung ïa ka bor jong ki shnong da kaba wanrah ïa ka jingpynkylla ha ka KHAD (Administration of Elaka) Act, 1991.
“Katkum kane ka aiñ ka shnong kan hap ban pynrung kyrteng bad lum thup (register/record) ïa ki jingtip baroh jong ki briew kiba shong ba sah hapoh shnong, kynthup ruh ïa kiba shong dukan”, u la ong.
“Ngi ïakren baroh shikatta ïa ka jingjur ka jingïoh rung ki bar Jylla hangne, bad ym don aiñ ban ong ba hap beit ban buh thup ne ai jingtip, hynrei mynta ym lah ban kiar hap thoh beit ha register jong ka shnong”, la ong u Bah P.N. Syiem bad bynrap ba u rangbah shnong un nym lah ban ai syrnot ïa ki briew ki bym don kyrteng hapoh shnong.
U la ong shuh shuh ba ha kane ka aiñ kan don ruh ka Vigilance Committee, ka ban pynshitom ïa kino-kino kiba leh kam sniew katkum ba shah ka lynti, nalor ba kan don ruh ïa ka ‘register’ jong ka dong ban peitngor ïa ka jingrung ki briew ba nabar.
Haba kylli ba kane ka aiñ ka lah ban ïatyngkhuh bad ki aiñ katkum ka riti synshar ka ri, u Bah P.N. Syiem u la ong ba kane ka aiñ kam khang ïa ïano-ïano ba kin shong shnong, hynrei ka dei ban don lyngba ki jingthoh bad ki kot ki sla ba la buh thup, bad bynrap ba da kaba leh kumta yn tip ruh ïa ki briew kiba ju leh ïa ki kam beaiñ.
