Tura, Risaw 24
U kyrtong ka Congress u Jingjang Marak u la pynpaw ka jingkyrmen skhem ba ka Congress kan sa ïoh biang ka jingjop ha kane ka kynti bad sa peit ïa kane ha ka 23 tarik Naiwieng.
Haba kren sha ki lad pathai khubor hadien ba la dep ban thep kyrteng, u Jingjang u la pynpaw ka jingkyrmen skhem ba ka Congress kan ïoh biang ka jingjop ha Gambegre, bad u la ong ruh ba lada u shah jied kum u nongmihkhmat, un pyndep ïa ki kam kiba dang sah bad ieh kumto.
“Kam don satia kano-kano ka jingban khia. Nga don ïa la ki jong ki thong bad kiwei ruh ki don ïa la ki jong ki thong bad ngin sa lah ban ïoh ïa ki. Shu peit bad ap, ka Congress kan sa jop,” u la ong.
Haba kylli halor ka jingkam da ki katto-katne ki kynhun jong ki briew ba kam don satia ka roi ka par ha ka jinglong MLA jong u Saleng Sangma, u Jingjang u la pynpaw ba kin don beit ki jingkam na ki briew kam pher watla wanrah katno ruh ki kam pynroi.
“Ka jingkwah jong ki briew ka long ka bymjukut, te kin don beit ki jingkynnoh wat lada phi la leh baroh ki kam. Phi ong ba ki don ki jingkynnoh pyrshah ïa u Saleng Sangma hynrei ngan ïathuh ïa phi ïa ka por kaba nga la leit shang kylleng kylleng bad u Saleng hapoh ka konstitwensi. Ngi la hap ban ïaid da ka kjat ha kito ki por hynrei mynta ki kali ki la lah ban ïaid na kane ka juh ka lynti. Kine ki dei ki kam jong u Saleng Sangma hynrei ki jingkynnoh kin don beit. Ngan ong aïu shuh halor kane?” la ong u Jingjang.
Haba phai pat sha ka kyrtong ka NPP, ka Dr Mehtab Chandee A Sangma haba kren sha ki lad pathai khubor hadien ba la dep thep kyrteng ka la ong ba baroh ki ilekshon ki dei kiba ïapher kawei na kawei pat hynrei kum ka seng, ka la pyrshang kat kaba lah ban ïakynduh ïa baroh ki nongthep vote.
“Ngan ïaleh katba lah ban pyrshang ban jop ïa kane ka ilekshon lyngba ki jingkyrshan kiba nga la ïoh kiba la wanrah ka jingkyrmen ha nga,” ka la ong.
“Nga sngew ba ka don ka jingïapher kaba rit hapdeng ka ilekshon kaba ju long bad ka ilekshon shiteng samoi namar ki paidbah ki la dep ban tip lypa mano ba don ha ka Sorkar bad mano kiba lah ban ai jingmyntoi sha ki,” la ong ka Mehtab.
Ka la pynpaw ba shibun ki dang donkam ban leh na ka bynta ka bit ka biang jong ki nongshong shnong bad ka surok kan dei ka mat kaba hakhmat eh ha ka thup.
“Kum ka doktor, ngan phai khmat bha ruh sha ka bynta jong ka koit ka khiah ha ryngkat bad kiwei pat ki bynta. Ki mat ba hakhmat kiba nga ruh, kan dei ki surok bad ki jingkieng namar ki don bun ki jaka kiba donkam ïa ki surok kiba paka. Kiba bun ki jaka kim don satia wat tang ka bording ilektrik bad ïa kine ruh ban hap peit bniah,” ka la ong.
Halor ka jingeh kaba hakhmat eh ha kane ka ilekshon, ka Mehtab ka la ong ba yn ym lah ban shu leh matlah ne kheiñ sting ïa ka jinglah jong u Saleng Sangma, namar u la long MLA la bun tylli ki samoi. “Ka jingïakhun hi kan long beit hapdeng ka NPP, TMC bad Congress, kaei kaba nga sngew,” la ong kane ka kyrtong ka NPP.
