Shillong, Risaw 24
Ki MDC ka Khasi Hills Autonomous District Council (KHADC) kiba la shah kheiñ kum ki MDC ba la kut por, ki la lah ban tynruh haduh ban da ïoh ïa ka muhor na u Lat ka Jylla, u C.H Vijayashankar, uba la dep ai muhor ïa hynriew tylli ki aiñ napdeng hynñiew tylli ki aiñ rew ba la mynjur da ka KHADC.
U Deputy CEM, Bah Pynshngaiñ N Sing Syiem u la ong ba lada la shu pynjlan ïa ka jingtreikam ki MDC khlem ka aiñ ka long ka bym dei, hynrei ïa kane ka samoi treikam la pynjlan katkum ka aiñ.
“Lada shu pynjlan khlem myntoi ka duhnong ka ri Khasi jong ngi, nga tharai lada ym pynjlan u CEM bad ka EC kin ïohlad ban leit tynruh sha u Lat ïa ki Bill”, u la ong bad bynrap ba hap ban peit baroh arliang jong ka pisa nar.
U la ong shuh shuh, “Ban shu ong ïa ngi ba ngi dei kiba la kut ka ‘expiry’, u dawai kuli u don bunjait u don uba tang shisnem bad u don ruh uba hynriew snem, lada dei bym pynjlan nga tharai ngi la duh ïa kine ki aiñ na ka bynta ban ïada ïa ka Ri Khasi.”
U la ong ba ki aiñ ki dei ki long kum ka kut baskhem ban ïada ïa ka Ri Khasi na ka jingshah hiar thma barieh.
Ka KHADC ka la ïoh muhor na u Lat ka Jylla haduh hynriew tylli ki Bill na ki hynñiew tylli kiba la mynjur hapoh ka ïingdorbar, kine ki bill ba la ïoh muhor ki kynthup ïa ka Khasi Hills Autonomous District (Administration of Elaka) (Amendment) Bill, 2023, The Khasi Hills Autonomous District (Nomination and Election of the Lyngdoh, Myntri, Lyngdoh Raid and Sordar Shnong and Administration of Sohïong Lyngdohship) Bill 2023, ka Khasi Hills Autonomous District (Regulation and Administration of Land) (Amendment) Bill, 2023, ka United Khasi-Jaintia Hills District Fishery (Amendment) Bill, 2023, ka Khasi Hills Autonomous District (Khasi Social Custom of Lineage) (Amendment) Bill, 2023 bad ka Khasi Hills Autonomous District (Trading by Non-Tribals) (Amendment) Rules, 2023.
