Shillong, Risaw 24
Ka Ministry of Rural Development (MoRD) ka la mang ïa ka song pisa kaba T.1056.82 klur sha ka Jylla Meghalaya na ka bynta ban pyntrei ïa ki surok bad ki jingkieng ïaid kali hapoh ka skhim Pradhan Mantri Gram Sadak Yojana-III.
Kane ka song pisa kaba T.1056.82 klur kaba la mang, ka dei na ka bynta ban pyntrei ïa 88 tylli ki surok kiba ka jingjrong haduh 782.155 km bad 55 tylli ki jingkieng.
Kane ka jingmang pisa ka long ruh shibynta na ka sienjam bala shim da ka Sorkar Pdeng ban pynkhlaiñ ïa ki lad ka leit ka wan ha ki jaka nongkyndong bad pynsted ka jingkiew ka ïoh ka kot ha ka thaiñ Shatei Lam-Mihngi.
Haba bteng ïa kane ka sienjam, ka Ministry of Rural Development, ka la dep ban mang 55 tylli ki surok ba jrong 443.26 km ha ka jingbei tyngka kaba T.412.34 klur ha ka Jylla hapoh ka PMGSY-III.
Kine ki surok ki dei ki ban kyntiew ka jingïoh ïa ki jingshakri ba kongsan kum ki lad ai jingsumar, ka pule puthi bad ki ïew. Ka jingkyntiew ïa ki lad ka leit ka wan ha ki jaka nongkyndong, da kaba pyndap ïa ki jaka ba suda hapdeng ki shnong bad ki jaka sor. Ka jingkyntiew ïa ka ïoh ka kot, ka khaïi-pateng ha ka thaiñ, ka jingplie ki lad ïoh kam bad pynshlur ïa ki lad kamai kajih ha ka thaiñ, ka ïahap bad ka thong jong ka Sorkar na ka bynta ka thaiñ Shatei Lam-Mihngi kaba seisoh bad ka India kaba la kiew shaphrang (Viksit Bharat).
Ki projek hapoh ka PMGSY-III kin wanrah jingkylla ha ka thaiñ, bad noh synñiang sha ka jingkiew shaphrang bad ka jingseisoh jong ka thaiñ Shatei Lam-Mihngi bad pynkhlaiñ ïa ka jingkut jingmut jong ka Sorkar na ka bynta ka roi ka par kaba kynthup ïa baroh.
