Nongpoh, Risaw 24
Ha kawei ka jingïatynrah kali ha ka step phyrngab ka Sngi Palei, lai ngut ki briew ba kynthup ïa u nongñiah, ki la mynsaw jur hadien ba ka kali Maruti Suzuki Alto kaba ki shong ka la leit ban rung shapoh ka khrum trok kaba dang ïeng harud ka surok bah National Highway 6 ha Umdihar, Ri Bhoi District.
Katkum ka khubor ba la ïoh lum na ki pulit, la ïathuh ba katei ka jingjia ka dei ha ka por kumba 5:40 eiei mynstep katba katei ka Maruti Suzuki Alto kaba don ïa u registration number ML05-W-5094 kaba la ñiah da u Bah Kynrong Dkhar, 23 snem ka rta, bad shong da u Rep Dkhar bad Kharlong Dkhar, ka la mih na ka shnong Wapung, East Jaiñtia Hills ban leit sha nongbah Guwahati.
La ïathuh ruh ba namar ka jingpynher bad ka jingñiah khlem-akor, tang mar ïa poi ha ki bynta jong ka shnong Umdihar, utei u nongñiah um lah shuh ban teh lakam ïa ka kali bad leit ban tynrah beit ïa u ‘divider’ jong ka surok bad leit ban rung pat sa nadien jong ka trok kit marjot kaba don ïa u registration number AS01-DD-9728 kaba dang pynïeng harud jong ka surok bah.
Ha kane ka jingjia, baroh lai ngut ki briew kiba don hapoh ka Alto ki la mynsaw jur bad la pynkit noh sha Nongpoh Civil Hospital ban ïoh ïa ka jingsumar kaba kyrkieh. Shuh shuh la ïathuh ruh ba namar ka jingjur jong ka jingmynsaw khamtam u nongñiah, la pynkynriah noh ïa ki baroh sha ka jaka ai jingsumar ha nongbah Shillong.
Ha kaba ïadei bad kane ka jingjia, ki pulit ki la rah noh ïa ka kali Maruti Suzuki Alto bad katei ka trok sha thanat Nongpoh na ka bynta ban pynlong shuh ïa ka jingtohkit bad ban leh ïa ki bynta katkum ki kyndon jong ka aiñ.
