Tura, Risaw 24
Ha ka Sngi Palei, ki la don sa lai ngut kiba la leit ban pyndep ïa ka jingthep kyrteng na ka bynta ban ïakhun ïa ka ilekshon MLA shiteng samoi ka ban long ha Gambegre Konstitwensi ha ka 13 tarik Naiwieng, 2024.
Kine kiba la pyndep ïa ka jingthep kyrteng hakhmat jong u Returning Officer ki long ka kyrtong jong ka NPP ka Mehtab Chandee A Sangma, kaba dei ruh ka kurim jong u Myntri Rangbah ka jylla u Conrad K Sangma, u kyrtong jong ka Congress u Jingjang Marak bad u kyrtong jong ka BJP u Bernard Marak.
Hadien ka jingthep kyrteng jong kitei lai ngut haduh ka Sngi Palei, ki kyrtong kiba la mih shakhmat ban ïakhun ïa ka ilekshon MLA shiteng samoi, ki la kot sha ka 6 ngut ba kynthup ïa ar ngut ki kyrtong shimet.
Kane ka ilekshon shiteng samoi kan long shisha kaba itynnad bha khamtam lei lyngba ka jingdon jong ar ngut ki longkmie kiba pawkhmat, kata ka kurim jong u Myntri Rangbah ba mynta ka jylla bad ruh ka kurim jong u Myntri barim ka jylla.
Ha kane ka sngi, nyngkong eh la ban wan thep kyrteng shwa u kyrtong jong ka Congress u Jingjang Marak ryngkat ka jingsynran lang ka Myntri barim ka Jylla ka Deborah Marak, ki nongïalam bad nongkyrshan ka Congress. U Saleng Sangma u la don lypa ha madan ha ka jingïaleh ban nang pynkhlaiñ shuh shuh ïa ka seng bad ha kaba ka Congress kan peit ruh ba kaei ka jingïoh ha ka MP ilekshon bad ka jingjop jong u Saleng kan ai ha kane ka ilekshon shiteng samoi.
Ïa ka kyrtong ka NPP ka Mehtab kaba la wan thep kyrteng, la synran lang da u kurim jong ka, u Conrad K Sangma uba dei u Nongïalam bad u Myntri Rangbah, ka kiaw jong ka ryngkat ki nongïalam ba hakhmat ka NPP nalor ki nongkyrshan.
Kumba ka long mynta ka NPP kan khmih lynti ba kan nang lah ban kyntiew shuh ïa u nombor ne ka jingbun briew ha ïingdorbar bad lyngba ka jingdon lypa ha ka bor synshar, kan don ha ka thong.
Uba la wan thep kyrteng khatduh ha kane ka sngi, u dei u Bernard Marak na ka BJP ha kaba la synran lang ïa u da ki nongkyrshan ha phyllaw jong ka shlem treikam Deputy Commissioner ka West Garo Hills.
Ki ar ngut ki kyrtong shimet kiba la pyndep ïa ka jingthep kyrteng ki kynthup ïa u Sengkrabirth Marak bad Jerry A Sangma. Ka MDC kynthei ba marwei ka GHADC bad kyrtong ka Trinamool Congress ka Sadhiarani Sangma, ka la pyndep ïa ka jingthep kyrteng.
