Shillong, Risaw 25
Ki ïing kiba la shna da ka tnat Pynroi Sor ha Nongmensong ban sah ki briew kiba duna ha ka ïoh ka kot mynta ki la shu kylla ïingjah bad kylla ruh kum ka ktem ki kam sniew.
Na ka liang ki nongïalam shnong bad ki longkmie ruh ki la ud la nam ba kane ka jaka kaba dei ban sah briew ka la long pynban ka bym ai jingshngaiñ ïa ka shnong ka thaw.
Kine ki ïing ne dwelling unit kiba heh bad kiba dei ban sah kham bun tylli ki longïing ki don saw tylli bad ki don mynta la kumba 15 snem khlem pat pyndonkam.
Haba leit peit ïa kane ka jaka, la lap ba kine ki ïing ki la sop da ki phlang ki kynbat ha ka kynti ban leit sha kine ki ïing bad ki jingkhang ïit bad ki jingkhang ki la shah pynjulor.
Ki kamra hapoh jong kine ki ïing ki la kylla long ki ktem kam awria, jaka dih kyiad bad drok.
La lap ruh ïa ki tiar kiba pyndonkam ban dih kynja, dih drok, nalor ki bitor kyiad kiba la pait bad bret pathar hapoh jong kine ki ïing. Ki kynroh hapoh ïing ki dap da ki jingthoh da ki ktien khlem-akor bad ki dur khlem-akor kiba la dro.
Ha kane hi kajuh ka jaka, ki dang don shuh sa san tylli ki ïing (dwelling unit) kiba la shna teng khlem pat pyndep bad ki la sah khongreng haduh mynta.
Ka jingkylla ktem kam sniew kine ki dwelling unit ka dei ka jingbym lah ka tnat Pynroi Sor ban pynbeit ïa ka rukom bhah ïa kine ki ïing bad aiti sha ki briew kiba dei ki nongïoh myntoi.
Kum ban pynkynmaw, 96 tylli ki ïing na ki 600 tylli la dep ban plie ha ka 6 tarik Nohprah, 2012 da ka Kong Ampareen Lyngdoh ha ka por ba ka dang long ka Myntri ka tnat Pynroi Sor.
Napdeng ki 96 tylli ki ïing, 64 ngut ki nongïoh myntoi ki dei na Nongmensong bad 32 ngut na Pynthorbah.
Kine ki ïing la tip kum ka Basic Services Urban Poor (BSUP) ba la mang da ka Sorkar Pdeng lyngba ka tnat Urban and Poverty Alleviation hapoh ka sub-mission-II jong ka Jawaharlal Nehru National Urban Renewal Mission (JNNURM).
Ïa kane ka Housing Project la mang pisa naduh u snem 2007 kumba T. 30.44 klur ban shna 600 tylli ki ïing (dwelling unit) ha ki ar bynta ha kaba T. 13.76 klur la mang ban shna 300 tylli bad ha ka wat ba-ar, la mang T. 16.68 klur ban shna sa 300 tylli.
Haduh u snem 2012, la dep pynlut T. 20.91 klur bad ïa ka kam la aiti sha ka Hindustan Prefab Limited (HPL) ban tei ïa kine ki ïing.
