Shillong, Risaw 25
Ki bahaïing jong ka Kong Niensidalin Riahtam, 45 snem bad i heprit, 4 snem haduh mynta ki dang sah ha ka umdum namar kim pat ïoh ïa ka kaiphot ‘post mortem’ na ka North Eastern Indira Gandhi Regional Institute of Health and Medical Science (NEIGRIHMS) halor ka jingsuba sha pynïap.
Kum ban shu pynkynmmaw katkum ka jingbatai ki bahaïing, ka Kong Niensidalin Riahtam ka la mih na ïing sah wai na Mawïong Umjapung da kaba ïalam lang ïa ka heprit ha ka step jong ka 18 tarik Nailur 2024 ba kan leit peit ïa ka ïing ba ka dang shu dep shna ha Mawïongrim. Hynrei haduh 10 baje mynstep haba kim wanphai ïing shuh na ka liang ki bahaïing ki hap ban pyntip noh sha ki bor shnong bad pulit.
Ïa kine baroh ar ngut (Kong Niensidalin & heprit) la lap da ki khynnah kiba leit sum ha ka wah Mawïong kaba don ha NEHU ha ka sngi ba bud kata ha ka 19 tarik u Nailur.
Haba la rah ïa ka met jong kine baroh ar ngut sha NEIGRIHMS Hospital ban ïoh leh ‘post mortem’ ha ka 20 tarik u Nailur da kaba pyntip ban pyndep ïa ka kaiphot hapoh ar taïew. Pynban kat haduh mynta ka 25 tarik Risaw, 2024 kaba la dap palat shi bnai na ka liang ki bahaïing kim pat ïoh ïa ka kaiphot.
Haba ïoh ban ïakren bad ki bahaïing ki la ïathuh ba ki la leit ïakynduh ïa ki bor pynïaid ka NEIGRIHMS Hospital tangba kim pat dep lut namar ki dang ap sa kiwei ki kaiphot.
Haba u nonglum khubor ‘U Nongsaiñ Hima’ u la buddien ïa kane ka jingjia, u la poi ban leit peit ïa ka ïingsah ba dang shu dep shna jong ka Kong Niensidalin ha Mawïongrim hynrei la lap ba ka long kaba kynjah namar la khang tala.
Katkum ka khubor na ki bahaïing, ka Kong Niensidalin ha ka step jong ka 18 tarik Nailur ka la leit ban prat ïa ki ñiut kiba don ha sawdong jong katei ka ïing ban leit peit namar ka thmu ban leit sah noh ynda la dep lut baroh.
Haba pyrshang ban ïakren bad ki bahaïing ki la pynpaw ba haduh mynta ki sah umdum namar ka slem palat ka kaiphot namar ki kwah tip kumno kine ar ngut ki khlad.
