Shillong, Risaw 25
Ki samla pule ka skulbah North Eastern Hill University (NEHU) hapoh ka NEHU Students’ Union (NEHUSU) bad ki dkhot ka KSU NEHU Unit, hynne ka Sngi Thohdieng ki la leit ban khang tala ïa ka kamra treikam u Registrar ka NEHU, da kaba ki la beh syndon ïa u Registrar, u retired Colonel Omkar Singh na katei kamra.
Kine ki samla pule ki la dawa na u Vice Chan-cellor, u Prabha Shankar Shukla ba u dei ban beh kam mardor ïa u Singh, halor ka jingkynnoh ba um long uba bit ban bat ïa ka kam kum u Registrar ha katei ka skulbah.
Hashwa ïa kane, hynne ka sngi u Vice Chancellor u la khot ïa ka jingïalang kaba 113 jong ka Academic Council (AC), bad ha katei ka jingïalang ki dkhot ka NEHUSU bad ki nonghikai hapoh ka NEHU Teachers’ Association (NEHUTA) ki la dawa na u VC ba u dei ban phah mih nong ïa u Singh na ka jingïalang, hynrei na ka liang u VC u la kyntait ban sngap ïa kane ka jingkwah ki nonghikai bad ki samla pule, kaba la pynlong ïa ki dkhot ka NEHUSU bad NEHUTA ban mih jyndat noh na ka jingïalang ka Academic Council.
U President ka NEHUSU, u Sandy Sohtun u la pynpaw ka jingsngewsih ïa ka jingmynthi jong u VC, u bym treh ban sngap haba ki la kyrpad ba un ong ïa u Registrar ban mih noh na ka jingïalang jong ka AC.
U la kynnoh ba u Registrar uba thung hi da u Vice Chancellor ka NEHU um don jingtip eiei ïa ki kyndon aiñ ka NEHU bad dang kham tip pynban ki samla pule.
“Ngim kwah ba u Registrar u bym don jingtip eiei un shong ha ka jingïalang kum u Secretary jong ka AC bad un thoh ïa ki jingïakren hapoh ka jingïalang”, la ong u Nongïalam ki samla pule. U la ong ba ka daw ba ki la mih noh na ka jingïalang ka dei namar ka jingmynthi jong u VC, uba la ïashah liang sha u Registrar namar um treh ban phah mih na ka jingïalang.
“Ngim kwah ba uno-uno u briew u bym tip ïa kaei-kaei un shong ha ka jingïalang jong ka VC kaba dei ka jaka pyrkhat kam kaha heh duh jong ka NEHU”, u la ong shuh-shuh.
U President ka NEHUSU u la ong ruh ba ka kynhun ki samla pule kan thoh sha u Myntri Sorkar Pdeng ba khmih ïa ka tnat Pule Puthi, sha ki ophisar ha Delhi bad kumjuh sha u Myntri Rangbah ka Jylla, ban dawa phah hiar shuki ïa u Registrar. Haba kyrshan ïa kane ka jingdawa jong ki samla pule, u President ka NEHUTA, u Prof. Lakhon Kma u la ther ïa u Vice Chancellor ka NEHU uba la ïaid lait ïa ki kyndon ka NEHU Act, bad thung ïa u Registrar u bym tip eiei bad u bym don jingtbit ban treikam. U la ong ba la dep ban kren ïa u VC ba kim don jingtip eiei ïa ki dkhot ka selection committee kiba donkti ban jied bad thung kam ïa Omkar Singh kum u Registrar.
“U VC u la pyrshang ban pynksan jubor halor ka jingthung kam ïa u briew u bym tip ïa kaei-kaei ha ka kyrdan Registrar, u VC bad kiba ïajan jong u kynthup u Registrar ki don hangne ban pynjot pynthohbria ïa ka kyrteng jong ka NEHU”, u la ong.
U Prof. Lakhon Kma u la ong ba kum kine ki Vice Chancellor, Registrar, Deputy Registrar kim donkam ba kin wan shong ha NEHU bad dang kham lah ban thung ïa ki senior professor kiba la don ka jingtbit jingshemphang.
