Shillong, Risaw 25
U nonglum pisa ïa ki bos kiba wan ïeng ha Inter State Bus Terminal (ISBT) kaba don ha Mawlai Mawïong u la hap shong satar watla ki bos kim wan ïeng shuh naduh ba la sdang maramot ïa ka jingkieng Umïam.
Une u nonglum pisa bai ïeng bos u la ïathuh ba namar u la trei ïa kane ka kam la slem, kumta um nang shuh ban leit bylla hynrei un hap shong satar ban shim bai ïeng kali lada dei ki baheh ne barit.
Kum ban shu pynkynmaw, ki bos kim shym la wan ïeng shuh ha ISBT naduh ba la sdang maramot ïa ka jingkieng Umïam. Kane ka ktah shi kat dei ïa ki nongleit-nongwan lyngba kane ka jingkieng, bad ym tang katta ïa kiba ap bai ïeng kali bad kiba shong dukan ruh kumjuh.
Wat hadien ba la dep maramot ïa kane jingkieng ha kine bnai ba la dep ruh la shah tang ïa ki kali rit, katba ïa ki bos bad trok pat dang khang.
Kane ka la ktah shi kat dei ïa ki briew kiba shong dukan ha kane ka jaka namar ki la im jakpoh na kane ka kam man ka sngi hynrei mynta pat don kiba hap shong ïing bad don kiba la leit bylla shawei.
Ki dukan ha ISBT ki don 30 tylli. Tangba kiba ju shong ki don hapoh 7 tylli hynrei mynta kine ruh ki la hap khang noh. Kane ka wanrah jingduhnong ym tang ïa ki nongshong dukan hynrei wat ïa ka Sorkar ruh namar kam ïoh shuh ban lum khajna na kine dukan. Ki dukan kiba siew bai wai ki long haduh T.11,000 shibnai bad kiba kham rit ki don la ka jong ka dor. Katkum ka jingïoh lum jingtip ki bos MTC kiba kamai sha Tura ki la ïeng ha Polo namar ki ïaid na Diengpasoh, katba ki bos kiba leit bad wan na kiwei ki jylla na Shatei Lam Mihngi ki ïeng ha Umïam.
Kumta, lada ki bos kim ïoh shuh ban ïeng ha ISBT ka long ka jingduhnong ïa ka Sorkar, namar ïa kane ka jaka la pynlut da ki phew klur.
La ïoh jingtip ba kiba bun kiba shong dukan ki la sdang wad shawei namar kim lah ban tip haduh lano yn shah ban ïaid kali na jingkieng Umïam.
Kum ban shu pynkynmaw biang ïa kane ka jaka ïeng bos la wan plie da u Amit Shah, Myntri ka tnat Pohïing ka Sorkar India ha ka 24 tarik Naitung 2021.
Ha ka jingjurip u nongthoh khubor kane ka jaka ka la kynjah namar ym don bos shuh kiba wan ïeng.
