Shillong, Risaw 25
U Symbud Myntri Rangbah ka Jylla ba khmih ïa ka Kam Pynroi Sor, Bah Sniawbhalang Dhar u la ong ba ka Sorkar kan pyndep ïa ka jingpynkynriah ïa ki briew ba sah ha Them Metor ha shwa ban kut une u snem.
“Shwa ban kut u Naiwieng ngin sa shim ïa ka rai namar mynta ki Harijan ki dang kyrpad ban aipor ba kin ïakren para ma ki halor katto-katne tylli ki mat, ki dang don ki jingïakren ba dang sah, hynrei ngi kyrmen ba ha shwa ban kut une u snem ngin lah pynkut ïa kane ka kam”, u la ong.
Ha kaba ïadei bad ka jaka ban pynkynriah, u la ong ba ka Sorkar ka la don ïa ka jaka katkum ba la pynkhreh ha ka saiñdur (Blueprint), hynrei ka jingïakren ban ïoh ruh ïa ka jaka shipai, bad bynrap ba lada ïoh da ka jaka shipai kan bha palat.
“Lada ngi ïoh da ka jaka shipai, ngin nym don -kam shuh ban ai ka jaka jong ka Sorkar. Ngi dang ap ïa ka jubab na ki shipai na ka bynta ka jaka”, la ong u Myntri, ha kaba u la ïathuh ruh ba katkum ka jingpynkhreh ba la shim na ka saiñdur jong ka Sorkar ka jaka ba donkam kan long kumba lai akar eiei.
Lah ban kdew ba ka Sorkar Jylla ka la khih khohreh ban pynkynriah noh ïa ki briew na Them Ïewmawlong sha Bishop Cotton road naduh ka jingïakynad kaba la mih ha u snem 2018, hynrei kane ka kam ka dang sahteng haduh mynta tang ha ka jingïakren kaba la bunsien hapdeng ka Sorkar bad ka Harijan Panchayat Committee.
