Shillong, Risaw 25
U Symbud Myntri Rangbah ba khmih ïa ka Tnad Transport, Bah Sniawbhalang Dhar u la ong ba ka Sorkar Jylla kam pat shym la pynkut satia ïa ka jingthmu ban wanrah ïa ka lynti rel hapoh ka Jylla.
“Ha kaba ïadei bad ka lynti rel kumba ngi la ju kren barabor, nyngkong eh ngin hap ban shim lang ïa ki jingpynsngew jong baroh ki kynhun kiba don bynta, hadien kata ka Sorkar kan sa shim ïa ka rai”, la ong u Myntri haba jubab sha ki nongthoh khubor.
U la ong ba haduh mynta ka Sorkar kam pat pynsangeh ïa ka jingthmu ban wanrah ïa ka lynti rel, hynrei kan ïakren bad sngap shwa ïa baroh kito kiba don bynta, kynthup ïa ki rangbah shnong bad ki kynhun bapher bapher.
Lah ban kdew ba ka Meghalaya Tourism Development Forum (MTDF) dang shen ka la kyntu ïa ka Jylla ban wanrah ïa ka policy ban kyntiew ïa ki kam jngohkai ha Jylla, bad ka la kyrpad ruh ïa ka Sorkar Pdeng ban mynjur na ka bynta ban wanrah ïa ka High Speed Luxury Rail Network (HSLRN), na ka bynta ban pynsuk ha ka leit ka wan ki nongjngohkai. Halor kane ka jingkwah jong ka MTDF ban wanrah ïa ka Luxury Rail Network, u Symbud Myntri Rangbah u la ong ba kane ka jingtyrwa ka long kaba biang bad shongnia. U Bah Dhar u la ong ruh ba halor kane ka phang un hap pan jingtip ruh na ka tnat Kam Jngohkai ka Jylla, ban tip kaei kaba ka tnat ka la dep ban ïakren.
