Nongpoh, Risaw 27
Ka University of Science & Technology Meghalaya (USTM) kaba don ha Killing, Ri Bhoi District ha ka sngi Saitjaiñ ka la pynlong ïa ka prokram lehkmen halor ka jingïoh jingmynjur (approval) jong ka PA Sangma International Medical College & Hospital na ka National Medical Commission (NMC) jong ka ri ban plie noh ïa katei ka jaka pule na ka bynta ka jingpule Bachelor of Medicine, Bachelor of Surgery (MBBS) kaba don 150 tylli ki seat.
Ha kane ka sngi rakhe ïa katei ka jaka pule kaba ai nam kyrpang ha kyrteng jong uwei na ki ‘riew saiñ hima sima ba pawnam ka ri lum Garo bad jong ka jylla Meghalaya, u Purno Agitok Sangma (bam kwai ha dwar U Blei), la wan ban ïadon bynta lang naduh u Conrad K Sangma, Myntri Rangbah ka jylla bad u khun jong u PA Sangma, ka Soradini K Sangma, kurim jong u PA Sangma (bam kwai ha dwar U Blei), ka Kong Ampareen Lyngdoh, Myntri jong ka Sorkar Jylla, u AT Mondal, Myntri ka Sorkar Jylla, u Bah Balajied Kupar Synrem, MLA jong ka Shella konstitwensi, u Mahbubul Hoque, Chancellor jong ka USTM lem bad kiwei kiwei. Haba ai jingkren ha kane ka sngi, u Conrad K Sangma u la pynpaw ïa ka jingsngewkmen kaba khraw halor ka jingïoh jingmynjur jong ka PA Sangma International Medical College & Hospital na ka NMC, kaba u la ong ba ka long kum ka jingphohsniew kaba la wan urlong shisha. U la ong ruh ba wat lada u kpa jong u, u la khlad noh na ka sla pyrthei, hynrei ka nam ka burom bad ki kam kiba u la synñiang sha ka imlang ka sahlang ka ïai im bad ai khublei kyrpang ruh ïa u Mahbubul Hoque uba la ai nam kyrpang ïa katei ka shlem pule ka ban sa plie noh shen ha ka kyrteng jong u kpa jong u.
U Conrad u la ïathuh khyndiat shaphang ka khana jong u kpa jong u, u PA Sangma uba im ïa ka jingim kaba eh bad kaba jynjar ha ka jingsdang ïaid lynti ka jong u, da kaba ïathuh ba u mih na la ïing ban lei ting briew tang kawei ka synduk kaba la thep tang shi jur ki jaiñ phong bad ki juti bad thom ïa ki jngeh jingjynjar haduh ba un long uwei na ki ‘riew saiñ hima sima ka jylla uba la bna nam ha ka ri hi baroh kawei.
Ha kane ka sngi, u Conrad u la ai jingmut ruh ïa ki bor pynïaid jong ka USTM ba kin shna noh da ka kynja Hall kaba kyrpang ban pynsah jingkynmaw ïa ki ‘riewkhraw ka jylla ryngkat ka khana ka jong ki, khnang ba ki samla pule bad ki paidbah kiba ïohi, kin tip ïa la ki jong ki ‘riew khraw jong ka jylla.
Shuh shuh na ka liang u Myntri Rangbah u la pynpaw ruh ha kane ka sngi na ka liang ka Sorkar Jylla, kan ai ïa ka jingkyrshan kaba pura ïa ka skulbah USTM ban pynlong ïa ka PA Sangma International Medical College & Hospital kum kawei na ki jaka pule bad ka jaka ai jingsumar kaba pawnam ym tang ha thaiñ Shatei Lam-Mihngi ne ka ri, hynrei wat sha ki ri jong ka pyrthei ruh kumjuh.
U Mahbubul Hoque haba ai jingkren ha kane ka sngi u la ai ïa ka jingkhublei kaba kyrpang sha ka Sorkar Meghalaya kaba la don ha syndah bad ka USTM ha ka jingïaid lynti ka jong ka naduh ba la sdang seng ïa ka ha u snem 2008. U Hoque u la pynpaw ruh ïa ka jingsngewnguh shikatdei ïa u Dr Donkupar Roy (bam kwai ha dwar U Blei) naba u dei uba don bynta ban ai jingbit bad pynurlong ïa ka jingseng ïa ka USTM ha ka por jong ka jinglong Myntri Rangbah ka jong u ha kito ki snem.
Shuh shuh, na ka liang u Hoque u la pynbna ruh ha kane ka sngi, ba ka USTM kan sa pynkha ruh sa kawei de ka shnat pule kaba ïadei bad ki bniat lane ka Dental College kaba yn ai kyrteng ban pynsahnam ïa u Dr. Donkupar Roy (bam kwai ha dwar U Blei).
