Khliehriat, Risaw 27
Ban kyntiew ïa ka ïoh ka kot ki paidbah nongshong shnong lyngba ki kam jngohkai pyrthei, ka shnong Chohshrieh ha East Jaiñtia Hills District ka la plie paidbah noh ïa kawei ka jaka jngohkai pyrthei kaba lah ban ïohi kyndiang ïa ka Pynthor Myntdu kaba la ai kyrteng ka Tuber Chohchrieh Khliehpynthor View Point.
Ïa kane ka Tuber Chohchrieh Khliehpynthor View Point la wan ban plie paidbah da u Myntri ka tnat Jngohkai Bah Paul Lyngdoh ha ka jingdonlang u Bah Kyrmen Shylla uba dei u Myntri bad MLA ka thaiñ.
Ïa kane ka Tuber Chohchrieh Khliehpynthor View Point ba la plie ha ka 26 tarik Risaw ba la bei tyngka lyngba ka skhim MGNREGA ha ka dor T.20.33 lak.
U Bah Paul Lyngdoh ha ka jingkren u la ïaroh ïa ka jinglah jong ka Dorbar Shnong ban pyntrei hok ïa ka skhim kaba long ka jingkyrkhu ïa ki paidbah nongshong shnong ba kin lah ban kyntiew ïa ka ïoh ka kot lyngba ka jingwan poi jong ki nongwan jngohkai pyrthei bad ha kajuh ka por u la kyntu ban sumar sukher bad ban pynitynnad shuh shuh ïa kane ka jaka.
Ha kane ka sngi ka Dorbar Shnong ka la aiti ïa ka dorkhas na ka bynta ban buh Zipline ha kane ka jaka bad na ka liang u Myntri ruh u la kular ban phah kloi katba lah ïa ki ophisar ban hiar jurip ïa kane.
Nalor u Myntri la donlang ruh u MDC ka JHADC Bah Lasky Rymbai, u Deputy Commissioner ka East Jaiñtia Hills District u Shivanash Awasthi, u BDO ka Wapung Block Dr. Tammiyaki Shylla, u Waheh Shnong Tuber Chohshrieh Bah Lar Bang nalor kiwei kiwei.
