Nongstoiñ, Risaw 27
Ka Joint Action Committee (JAC) jong lai tylli ki Polling Station ba kynthup ïa ka Misei, Langdongdai bad ka Mawsnai kiba kynthup ruh ïa ki 21 tylli ki shnong ki la ai por haduh ka 2 tarik Naiwieng, 2024 ïa ka KHADC lyngba ka Selection Committee ban pynbna ba ïa ki 21 tylli ki shnong la pynphai biang sha Mawshynrut Konstitwensi lym kumta kin pynjur shuh shuh ïa ki jingïakhih.
Ïa kane la ong da u Chairman ka JAC u Bah Jeremiia Dkhar ha ka kyrwoh khubor ba la phah, hadien ba ka JAC ka la pynlong biang ïa ka executive committee ha ka Sngi Saitjaiñ jong ka taïew ban ïa pyrkhat bad ïatai sani halor ka jingïai sngap mynthi bad ka jingbym patiaw jong ka KHADC ïa ka jingdawa ban pynneh ïa ki lai tylli ki Polling Station ha Mawshynrut Konstitwensi ym ban pynhap sha Rambrai-Jyrngam Konstitwensi.
U Bah Jeremiia Dkhar u la ong ba ka JAC ka kyntu ruh ïa u Symbud Myntri Rangbah ka Jylla u Bah Prestone Tynsong uba khmih ïa ka tnat DCA ban tuklar lem halor kane ka jingdawa.
Shuh shuh u la ong ruh ba ka JAC Ki Lai Polling Station ka kren shai ba kim pdiang ïa ka jingai khubor ne ka jingpynpaw jong u Bah PN Syiem, Deputy CEM ka KHADC ban ïaishah shipor haduh ban da wanrah ïa ka ‘amendment’ jong ka Khyrnit Hynriew (Sixth Schedule) ban ïoh pynbeit thymmai biang ïa ki shnong ki thaw.
