Shillong, Risaw:
Ka Laitkroh Kasturba Gandhi Gram Seva Centre (LKGGSC) kaba don ha shnong Kyrdemkhla (Ilaka Laitkroh Sirdarship) East Khasi Hills, Meghalaya, ka la pynthymmai ïa ki nongkitkam ha ka thaiñ. Ïa ki nongkitkam bathymmai la jied ha ka 19 tarik, Risaw, 2024. Kine ki kynthup ïa u President Bah Aliham Zed Sohtun, Vice-President Bah Maradona Nongkhlaw, uba long ruh u Rangbah Shnong Kyrdemkhla, Secretary-Cum-Treasurer, Samla Babita Nair, Asstt. Secretary, Samla Anjumoni Cenapati bad Kong Balari Lyngdoh, Adviser Bah Sanjeeb Kakoti, Executive Member, Bah Skhem Mawñiuh, Bah Soket Sohtun, Kong Minolis Donmon, Kong Daphiralin Kurkalang, Kong, Hiramita Kharkongor, Kong Lapynkmenlang Pyngrope. Ïa ka LKGGSC la tei naduh ka 14, Rymphang, 1955 hapoh ka khyndew jong ka hi.
Ha Meghalaya kane ka seng treimon sngewbah ka don 4 tylli ki tnat ha Meghalaya kata ha Megupara bad Jambal hapoh Garo Hills, ha Tuber kaba ha Jaiñtia Hills District bad ha Laitkroh. Ïa kane la seng da u Mahatma Gandhi ha ka kyrteng jong ka kurim jong u ka Kasturba Gandhi, ka long ruh kawei napdeng ki seng treimon sngewbha ba la rim tam hapoh ri India, ka Representative Office jong ka ka don ha Guwahati Sarania, Ullubari, Assam na ka bynta ka North East bad ki shlem treikam jong ka ki don lajan haman ki jylla bad ki Union Territory jong ka ri India. Ka Headquarter jong ka ka don ha Indore (Madhya Pradesh), India.
Hangne la ai jinghikai da ar ngut ki nongïarap (Gram Sevika) bad uwei pat u Helper-Cum-Chokidar kiba na Assam, ha kaba la ïai ai jinghikai pyntbit ïa ki longkmie bad ki khynnah kynthei, ha ki kam thaiñ ne suh jaiñ, rep phan, jhur, ri masi, la ju don ruh kum ka Creche jaka ba ri bad ai bam ei ïa ki khyllung kiba hapoh 6 snem jong ki kpa ki kmie ba leit trei lyngkha, bylla bad kumta ter ter, Social Awareness Programming ha kiba bun ki khep treikam bapher bapher na ka por sha ka por ha ryngkat ki jingkyrshan kum da ka Distrik Social Welfare Deptt. Govt. Meghalaya, District Sericulture Deptt. (Textile) Govt. Meghalaya, bad kiwei kiwei ki tnat sorkar. Na ka bynta ki jingmyntoi lang ki paidbah kine ki thaiñ la khmih da ka Managing Committee (MC) kaba hap hapoh ka LKGGSC.
