Shillong, Risaw 27
Ki lynti ïaid ha Khyndai Lad ki la nang khapngiah katba nang ïaid ki por bad ki paidbah nongleit-nongwan ki la pynpaw ba lada ym dei ba ailad ban ïaid ki kali katta la nang wan kyntur kiba shong die madan.
Ha ka jingshisha, ka Sorkar ka la thmu ban pynkylluid ïa ki lynti ha Khyndai Lad naduh ka lynti kaba rung na surokbah sha Bijou Cinema ter ter shaduh Dreamland ha Umsohsun.
Hynrei ka jingmih shuh-shuh kiba shim kabu ban die jingdie madan ka la nang pynkhapngiah ïa ka lynti ha Khyndai Lad bad buh jingeh ïa ki paidbah nongïaid lynti.
Ki nongdie jingdie madan naduh kiba die ïa ki jaiñ kiba la rim bad ki jaiñ thymmai bad kiwei kiwei ki tiar ki la phriang harud lynti ban die sha ki briew kiba ïaid lynti na Khyndai Lad sha Umsohsun. Ha ki sngi ba bun bha ki nongïaid lynti ka long kaba khapngiah namar ki nongdie jingdie madan ki la don baroh arliang lynti.
Haba ïakren bad ki paidbah kiba ïaid lynti, ki la ong ba lada ka Sorkar kam nud ban leh eiei, ka jingkhapngiah ka lynti ïaid kan nang jur namar kiba die jingdie madan ki tang shu ïohlad kin kyntur beit ban shong ha lynti ha ka kyrteng ka jingkamai.
“Lada dei ba ym shah lei-lei ban ïaid ki kali napdeng ïew ha Khyndai Lad, katta ka lynti ïaid ka la nang rit bad buh jingeh ïa kiba ïaid lynti,” la pynpaw kiba bun kiba ïaid lynti ha thaiñ Khyndai Lad.
Ki la ong ba ka jingshlur ki briew ban wan shong die jingdie madan ka dei ka jingbym nud ki bor ba dei ban khmih ban khynra na ka por sha ka por kumba ju leh ha ki por kiba mynshwa.
Uwei na ki nongleit ïew ha thaiñ Khyndai Lad u ong ba ka jingkhapngiah kan buh jingeh bha lada don kano- kano ka jingjia ha thaiñ Khyndai Lad ha kaba u la pynkynmaw ruh ïa ka jingpluh ha u snem ba la leit kaba la buh jingeh ïa ki kali pynlip ding ban wan kloi.
Une u ‘riew rangbah u la ong ba ki paidbah ki dei ban sngewthuh ba ka lynti ïaid kam dei ka jaka shong ïew namar kiba ïaid lynti ruh ki don ka hok ban ïaid bad ka jingkhapngiah ka buh jingma lut ïa baroh khamtam lada jia kino-kino ki jingjia kiba pynsyier ha kaba ki briew ki hap ban mareh lymwir bad phet ban lait im.
Kumta ka Sorkar ka dei ban leh eiei ban pynkylluid ïa ka thaiñ Khyndai Lad ym ban ailad ïa ki briew ban shong die jingdie katba mon da kaba kyntur sha lynti kaba ju ïaid ki paidbah.
